Muestra d’Eco-Talleres de Gaia y Sophia nel ecoLLAB. Charla y presentación el vienres 4 de payares a les 18:00 h. Ecotaller sábadu 3 d’avientu a les 10:30.
El día 2 de payares, l’Almanaque del Zaragozanu recuérdanos que ye San Xusto y San Roque, y que la lluna ta nel so primer cuartu creciente, más exactamente n’Acuariu. Esi mesmu día va formar parte de la sala d’esposiciones del ecoLLAB, nel Almacén Sur de LLABoral, un instante espacial nuevu de tiempu condensáu. Una antoloxía d’instantes gráficos, aportaciones artístiques y reflexones frutu d’esperiencies facilitaes en Finques Ecolóxiques a lo llargo de los alcuentros d’Ecotalleres celebraos n’Asturies a lo llargo del branu del 2011.
Col nome (proposición) Vivir Experiencias queremos englobar el resultáu sinérxicu de la simbiosis ente l’ecoLLAB y los alcuentros d’Ecotalleres; la so coexistencia na sala d’esposiciones, nel non-xardín y al traviés d’actividaes dientro d’elles.
El vienres 4 de payares a les 18:00 h va facese una charla-presentación eco-espicha, que va tratar de compartir cómo y por qué se fixeron los alcuentros d’Ecotalleres y qué aprendimos los que formemos parte d’ellos. Aprovechando esta ocasión única y rica, el proyectu de los alcuentros d’Ecotalleres va dar un saltu cualitativu, propiu d’un espaciu d’investigación como ye la plataforma cero, y va aventurase pela primer vez a dominios urbanos.
El sábadu 3 d’avientu a les 10:30 h va facese un alcuentru d’Ecotalleres nel non-xardín tecno-ecolóxicu de LLABoral. Un contestu complexu xestáu nun mundu por venir, un paisaxe d’ensuañu nuna domina cambiante. Un sentíu de llugar que, como los demás llares pasaos de los alcuentros d’ecotalleres, forma parte de la tresformación socio-ecolóxica que manifiesta la nuestra dómina. Proponemos un procesu dinámicu y fluyíu que, encalzáu pola facilitación de los Ecotalleres y la co-creación del Currículu Invisible, quier enanchar el pelegrinaxe que da vida al proyectu.
El términu Ecotalleres ye sinónimu de «talleres del llar». Eco-, «oikos» del griegu, vien a englobar lo que ye vezu distinguir como “casa”, “llar” y “familia”; faciendo referencia tanto al espaciu material onde vivimos (l’ambiente), como al sentimientu acoyedor que compartimos la familia que lu habita. Un Ecotaller ye como un cuartu, colos sos detalles y formes, que da pie a una forma determinada de desenvolvese dientro d’esi llar, que formamos la gran familia del planeta tierra.
El “contestu” ye un aspectu clave del llamáu currículu invisible, yá que reconocemos que l’aprendimientu nun se da en cualquier sitiu y por eso los espacios son un elementu esencial y integral de la educación ambiental. La xente arriquécese tanto del ambiente onde ta aprendiendo como de los sos profesores y los sos compañeros. Muncho d’ésti aprendimientu ye consciente, pero tamién pue ser –y davezu yelo- inconsciente. Nun siendo que se llame l’atención sobre esto, munchos participantes simplemente nun se decaten de lo que tán aprendiendo. Por eso, atribuyéndo-y esi valor al contestu, la escoyeta de los sitios onde s’alluguen los alcuentros y la proyección artística que s’implementa nél, faise cola mira de resaltar l’espíritu ecolóxicu de cada sitiu; el so sentiú de llugar.
Vivir experiencias quier crear l’espaciu y los procesos precisos pa fomentar la creación de vínculos, redes y rellaciones ente los asistentes. Motívanos pensar que siempre vamos conocer a daquién nuevu con muncho qu’apurrir a un proyectu coles puertes abiertes.
Instantes y elementos artísticos del procesu Vivir Experiencias
Videu y imáxenes de «Alcuentru d’Ecotalleres»
Un videu y una colección de semeyes va dexar a los visitantes de la esposición saboriar dellos de los sentimientos capturaos por cámares nos trés alcuentros d’ecotalleres celebraos a lo llargo del branu del 2011.
Finxos y Equilibrios por Babubai
Espardíos pel paisaxe de los alcuentros d’Ecotalleres pónense finxos y equilibrios que valen de vínculos ente los ecotalleres y el sitiu. Cada pieza escenifica de forma efímera’l sitiu y l’harmonía del alcuentru. Símbolos de l’aunión ente l’arte y la ecoloxía que van dar sentíu y procesu a les actividaes que vamos desenvolver nos Ecotalleres.
El mosaicu fluyíu de los participantes del alcuentru d’Ecotalleres
La naturaleza del mosaicu fluyíu quier ser reflexu de la vivencia colectiva, amás de les cualidaes y sentimientos que nos tresmite’l paisaxe, la contorna. Por eso, esti mosaicu va exhibise adoptando delles disposiciones, composiciones en cada sitiu que visite. Con esto quier espresase la complexidá de la historia y, polo tanto, la diversidá de composiciones y interpretaciones.
Llaberintu de calabaces. La vida ye como una poesía
Va haber un llaberintu que va poder visitar cualquier persona en cualquier momentu, individual o colectivamente. Al traviés del paséu, del camín que nos muestra, esperimentamos los secretos de la vida, de toa vida; que nun son les complicaciones de la sociedá, sinón el camín que caldía esperimentamos como seres humanos, y la rede natural complexa onde nos sostenemos. Al tiempu qu’avanzamos pal centru del llaberintu marcáu por calabaces de colores, dexamos otru mundu detrás pa descubrir una idea nueva, un trozu de poesía, un cantar infantil o un retu de palabres nuevu, que forma parte de nós y abre les nuestres percepciones. Quien quiera garrales va poder reflexonar sobre ello, y quien quiera, va poder disfrutar de la sorpresa como una anécdota del día. La vida ye como una poesía de rimes y frases, d’acciones y caminos qu’atopamos.
Audiu de la esposición nel Almacén Sur
Pa esta esposición, les artistes asturianes Las CasiCasiotone crearon un paisaxe sonoru confeccionáu al traviés de grabaciones de campu (dalgunes d’elles de los propios talleres) y soníos xeneraos por instrumentos analóxicos y virtuales. Esti resume sonoru xenera un paisaxe ambiental qu’acompaña a la esposición treslladando al espectador a los paraxes más íntimos de la naturaleza.
Testu Vivir Experiencies
Acompañando les imáxenes y el videu nel Almacen Sur, van incluyise sentimientos, ilusiones y impresiones en formatu de testu editáu, dende la perspectiva de Gaia y Sofía como entamadores y promotores de los alcuentros d’Ecotalleres.