El fin del video-arte
Nos últimos años, son cada vez más los artistas qu’usen el videu como parte de la so investigación creativa. Si nel pasáu’l video-arte considerábase, en sí mesmu, una categoría artística, anguaño’l so usu espardíu ente creadores que trabayen tamién con otros soportes fixo que nos cuestionemos si podemos siguir entendiéndolu como una actividá diferenciada. Ello ye que se trata d’un mediu cada vez más accesible gracies a la llegada d’equipos más pequeños y potentes, dende les mini-grabadores de videu n’alta definición a los ordenadores portátiles que dexen editar sobre la marcha imáxenes grabaes y alcontraes. Como consecuencia, tanto la producción como la distribución del videu evolucionaron y impregnaron toa clas de práctiques artístiques. Les obres presentaes nesta esposición proceden de los archivos de Move on Asia y nagüen por ufiertar una visión panorámica de la producción abondosa de video-arte na Cuenca del Pacíficu, amás de la diversidá del so ámbitu d’acción.
Principiáu nel 2004 por Jinsuk Suh, director d’Alternative Space Loop de Seúl, Move on Asia celebró’l quintu aniversariu nel 2010. El so programa consiste nuna presentación d’obres de videu y animación, escoyíes cada añu por un equipu diferente de comisarios asiáticos, y creaes por artistes de países como Australia, China, Hong Kong, India, Paquistán, Indonesia, Xapón, Filipines, Singapur, Corea del Sur, Tailandia y Vietnam.