Reconstrucción de la memoria
Los planos que s’intersecten pa dar forma a esta exhibición son el devenir históricu y la narrativa. Historias fugaces pon en crisis estos planos a partir d’aquello que necesita recuperase, la memoria que piensa’l pasáu y la representación de momentos suxetivos; quier dicise, los vínculos ente imaxinación y memoria, recuerdu y imaxe, onde la narración determina sitios, tiempos y velocidaes al cúmulu d’acontecimientos.
Les obres equí axuntaes dan testimoniu de la nuestra rellación col tiempu, del escaecimientu colectivu y de la escoyeta que realizamos tocante a recordar, al mesmu tiempu qu’allumen la manera en que recuperamos formes pa cuntar estes histories. Estos vídeos enfóquense n’histories curties, cuntaes dende estratexes diverses. Les práctiques incluyen recreaciones de momentos de la historia familiar y colectiva, xestos menores realizaos pa la cámara, arqueoloxíes de la memoria, la esploración d’espacios mentales y la puesta n’escena d’instantes efímeros. Yá seya a partir de trabayar el testu o de representar l’ausencia, de paisaxes urbanos que resuenen cola abstracción condensando la realidá concreta, o de poner en primer planu temporalidaes personales, lo qu’equí se recupera ye la posibilidá de reinxertar al suxetu y al so axenciamientu sobre’l devenir históricu.
La recuperación de memories personales énte los grandes rellatos dexa inscribir narratives testimoniales, reflexonar sobre acontecimientos colectivos dende’l filtru de les esperiencias familiares y incluyir narraciones de grupos subalternos. Al abrir la posibilidá d’enunciar dende l’alteridá, les tensiones sociales evidénciense y intensifiquense y les memories en conflictu polarícense. Ye xusto nestes circunstancies, cuando l’error y la inseguranza entren n’escena, onde la realidá inmediata determina la forma y el conteníu de les obres.
A partir de micro histories y enunciaos múltiples, estes pieces enfaticen el potencial del arte, pa presentar narratives tanxenciales a los discursos hexemónicos construyíos polos medios de comunicación. Si la presentación en tiempu real moviliza’l discursu mediáticu, tracamundiando memoria y historia, l’enfoque poéticu apunta a esplorar lo escondío nes pliegues del recuerdu y val como estratexa pa que los significaos puedan ser reinscritos. La temporalidá con que la novedá de lo noticioso da pasu al escaecimientu del acontecimientu reviértese, a partir d’usar la estensión del momentu como estratexa que dexa espertar una mirada reflexiva.
Al mesmu tiempu, les tensiones ente ocultamientu y visibilidá son examinaes. Los vídeos incluyen esploraciones tocante a les llendes del rexistru n’imaxe y la construcción llinial d’histories qu’acueyen. El narrar y recordar caltiénense como práctiques vitales que s’exercen na acción, al fixar un eventu con implicaciones étiques y morales. Nesti sentíu márcase una diferencia ente rememorar y el memorial, el primeru como un exerciciu activu nel presente y el segundu como una forma de saldar cuentes col pasáu.
Frente a los fluxos d’amnesia cultural, estes obres llévennos a visitar el pasáu, non con un deséu por revivilu, sinón pa encaranos con una llectura de planos múltiples y simultáneos. Axuntaes, les imáxenes revelen intensidaes distintes de la memoria cultural, dende los márxenes de la intimidá qu’anicia metanes de paisaxes políticos y sociales percomplexos.