Un percorríu curtiu per cinco décades al traviés de diez obres.
A lo llargo del 2011, LLABoral va facer una revisión fonda del panorama internacional del video-arte, con ciclos diversos na so Mediateca Espandida, un espaciu d’esperimentación curatorial qu’ufierta a productores culturales (artistes, investigadores, diseñadores, arquitectos, músicos, desenvolvedores de xuegos, etc.) la oportunidá de participar nun exerciciu empobináu a esparder conocencia al traviés de procesos que d’otra manera diben ser invisibles, amás de reflexonar sobre les formes de crear interfaces de trabayu nueves que nun tienen sitiu nun entornu espositivu clásicu.
Universo vídeo empieza una llinia de trabayu nueva, cola que’l Centru d’Arte y Creación Industrial propónse presentar una investigación alredor d’esti mediu, presentando obres feches dende los años 60 hasta l’actualidá. Pa eso, parte de la perspectiva que dan comisarios procedentes de dellos sitios del mundu.
Les diez pieces de videu monocanal que s’esponen nesta muestra, y qu’abarquen cinco décades, proceden del archivu tan ampliu d’Electronic Arts Intermix (EAI), una entidá ensin afán d’arriquecimientu con sede en Nueva York dedicáu al media art. Nel 2011, EAI celebra’l 40 aniversariu, una efeméride que val de marcu de reflexón sobre les munches histories, práctiques artístiques y contestos que dieron forma al media art n’Estaos Uníos.
Más qu’una antoloxía, tenemos que contemplar Historias cinéticas como un viaxe discursivu per dalgunes de les intervenciones creatives y les visiones prodixoses que caracterizaron l’usu que los artistas fixeron del videu y de los medios dixitales. Espónense, nun diálogu recíprocu, dos pieces por cauna de les décades que medien ente los años 60 y los 2000. De les improvisaciones analóxiques de la década de los 60 a los remezcles dixitales de primeros del sieglu actual, les obres capten los paisaxes culturales, tecnolóxicos y artísticos concretos (y eclécticos) d’onde surdieron.
Y anque les obres dexen ver formes y estratexes múltiples, tán atravesaes por un filu conductor esencial representáu polos compromisos básicos de los creadores cola cultura de los media. Les manipulaciones televisives radicales de los 60 y 70 tienen el reflexu nes investigaciones de recién na ubicuidá de les tecnoloxíes dixitales y la cultura d’Internet. Al activar un diálogu ente obres diverxentes nel tiempu y al traviés del tiempu, esti viaxe cinéticu esplora tamién la idea del “salón” como espaciu animáu pa la conversación y l’intercambéu.