There is No Road (the road is made by walking) ye una esposición de creación contemporánea con pieces d’imaxe en movimientu y d’otros medios al cargu de catorce artistes internacionales, que n’alredor de la metá de los casos consisten n’encargos nuevos que se van mostrar pela primer vez na LLABoral.
Basada nel famosu versu del poeta Antonio Machado, There is No Road consiste nun conxuntu de proyectos d’artistes que rexistren o evoquen una serie de viaxes, reales o imaxinarios, pel paisaxe asturianu o per terrenos tamién alloñaos y montascosos.
Munchos d’esos viaxes danse dientro d’un espíritu de ‘pelegrinaxe’ inspiráu pola cercanía del Camín de Santiagu que percuerre’l norte d’España. Faciéndose ecu del Camín, los viaxes, davezu fechos a pie, diríxense escontra allugamientos icónicos y de relevancia cultural o hacia sitios de resonancia histórica, descubriendo o rastrexando al facelo senderos que yá se percorrieron bien de veces. Al revés, n’otros casos trátase d’incursiones na naturaleza más arispia, adientrándose per sitios onde les carreteres desapaecen o que queden escurecíos pola borrina y l’agua tan característicos d’esa topografía montascosa tan aislada; unos periplos per carreteres que se vuelven intransitables o al traviés de sitios entá por forxar o descubrir, como percorríos la primer vez.
Nel so intentu por retratar dalgo de la guapura natural tan estraordinaria d’Asturies (y d’otros paisaxes montascosos, averaos o más exóticos), There is No Road propónse la esploración, al traviés d’una serie de soportes diferentes, d’un ‘espíritu de sitiu’ tan singular como resistente. Al llau de pieces frutu d’encargos nuevos que traen a artistes internacionales a Asturies, la muestra sorraya tamién dellos viaxes y alcuentros personales al empar cotidianos y universales, destacando de manera especial les afinidaes y conexones ente Gran Bretaña y España. Ente los artistes incluyíos na muestra cúntase con Axel Antas, Ibon Aranberri, Ergin Cavusoglu, Gabriel Díaz, A K Dolven, Simon Faithfull, Annabel Howland, Roberto Lorenzo, Lutz & Guggisberg, Alexander & Susan Maris, Simon Pope, Erika Tan.