Íñigo Bilbao (España, 1975), “TACs”, 2008. Videoproyección y cinco escultures dixitales (prototipos de resina fotosensible) realizaes a partir de los archivos DICOM (Digital Imaging and Communications in Medicine) derivaos de someter a los modelos, escoyíos pol autor a un escáner médicu (TAC).
Al traviés del usu de ferramientes propies de la medicina y el diseñu industrial, Íñigo Bilbao retrata tanto l’aspectu esterior del modelu, cambiante y perecederu, como la so estructura interna más sólida y perdurable: la so estructura ósea. Los datos obteníos cuando un suxetu se somete a un TAC (Tomografía Axial Computarizada) o a una MRI (Magnetic Resonance Imaging) úsense como mediu de diagnósticu. Sicasí, esos mesmos datos resulten, nesti casu, esplotaos pol autor con una finalidá artística. Esperiméntase d’esta manera col potencial creativu tan altu que’l hardware y el software médicos guarden cuando s’usen en combinación con software de modeláu 3D y máquines de prototipáu rápidu.
La realización d’un TAC o d’una resonancia magnética da como resultáu una serie d’imáxenes en dos dimensiones. Normalmente éstes dan la información necesaria a la hora d’efectuar un diagnósticu, pero tamién pueden combinase ente elles, al traviés de software médico, p’algamar un modelu virtual en trés dimensiones. Esta última alternativa resulta menos frecuente y la so aplicación tien fines poco avezaos anguaño, como previsualizar intervenciones quirúrxiques complexes o’l diseñu de prótesis. Nesos modelos tridimensionales ye factible mostrar tanto la estructura ósea del paciente como los sos órganos internos y la superficie esterior, la piel. Esta escoyeta del software médico tien un potencial artísticu notable, nel que la esploración ye ún de los fines principales del proyectu “TACs”.
En resume, les ferramientes médiques empléguense de forma inusual: escaniando modelos sanos, en posiciones impropies pal diagnósticu, mostrando errores y interferencies, con un usu acullá del científicu.