4.u alcuentru de cultura llibre. Espaciu d’información en procesu
Les dinámiques del arte contemporaneu fixéronse más complexes cuestionando, ente otros aspectos, les técniques tradicionales pa la so documentación. L’alcuentru SummerLLAB emerxe como un resume esquisitu d’estes maneres nueves d’entender la producción y investigación artística.
El SummerLLAB pue lleese como un organismu vivu, procesual y social, un territoriu onde converxen la tecnoloxía, la ciencia, l’arte y la naturaleza; onde s’axunten practicantes de delles disciplines, países y intereses. Un espaciu definíu pola ausencia d’autor, la non llinialidá, la collaboración, la esperimentación, la visceralidá, el failo tu mesmu-failo con otros, el hackéu, la mezcla, l’atemporalidá, el conocimientu común, la virtualidá, l’anarquismu, la inclusión, l’alquimia, la tresparencia, la horizontalidá.
A lo llargo de cinco díes, performance, estudios de xéneru, software llibre, diseñu, fabricación, reciclaxe, electrónica, crítica social y institucional, esperimentación visual y sonora, xeografía, astronomía y bioloxía, conviven, entemécense, hibrídense, fusiónense y dan cuenta d’estes maneres nueves de producción nel arte contemporaneu.
Si bien el SummerLLAB s’inscribe dientro del marcu institucional, atopa nes sos fronteres y determinos los medios de cultivu afayadizos pa la creación. Marxe o periferia dílense, equí too se conecta, s’entrellacia, se comunica. Los resultaos d’esti eventu nun son oxetos museísticos acabaos sinón la construcción de ferramientes crítiques, sociales y creatives pa cambiar el paradigma del arte y esperimentar con ámbitos nuevos de la creación y la tresmisión del conocimientu.
Dende’l nodu Anarchivo, más qu’un axente esternu documentalista de socesos, quiximos ser parte d’esta gran performance, integrándonos nel so ritmu de calter rizomáticu, que dio como resultáu nicios d’una infinidá de dinámiques y realidaes que cada participante apurre. Esti exerciciu de documentación nun quier conxelar la memoria del eventu y reducila a un videu o imaxe, namás ufierta miraes fragmentaries que, al traviés de performatividá y interacción de l’audiencia, van dir garrando dellos significaos, que van activar llectures y maneres de pensar y convidar a crear y proponer formes nueves d’intercambéu social-artísticu.
Esta muestra nun propón una xerarquía, un percorríu premeditáu, una llectura única y llinial; ta abierta a interpretaciones, conexones. Nun ye un productu final sinón un espaciu d’información en procesu.