Instalación audiovisual interactiva resultáu de los II talleres MADI (Música Avanzada y Discapacidá Intelectual), realizaos n’Avilés ente avientu del 2009 y xineru del 2010.
Silencio sigue una de les consignes clave nel proyectu MADI: convertir a los participantes en suxetos activos que producen obres d’arte y s’encaren coles crítiques de la sociedá ensin indulxencia.
Ye una reflexón sobre l’allugamientu de les persones con discapacidá na sociedá actual, emponderando pencima de too’l valor de lo diferente y del arriquecimientu que supón averase a la realidá dende prismes variaos.
Esta pieza ye frutu d’un procesu nel que compartimos hores faciendo música xuntos y falando sobre temes que nos importen. Toles conversaciones ente’l grupu grabáronse y d’ehí trescribimos fragmentos significativos que componen la exa central de la pieza: un testu, alredor del que proponemos un entornu audiovisual interactivu col que’l públicu pue xugar, creando composiciones nueves a partir de les imáxenes y soníos producíos nel trescursu de los talleres.
El resultáu ye una deconstrucción del llinguaxe pa relativizar el conceptu de discapacidá y espresar les nuestres inquietúes sobre’l futuru llaboral, les rellaciones de pareya, la vida cotidiana, l’arte y la música, etc.
La muestra faise n’Almacén Sur, un espaciu pensáu p’abellugar manifestaciones artístiques desenvueltes fuera de los calces habituales y sofitaes y xestionaes directamente polos mesmos creadores.