Feedforward. El ángel de la Historia encara’l momentu históricu actual nel que los escombrios del conflictu políticu y la desigualdá económica amontónense mentes les fuercies globalizaes, reforciaes en bona midida pol “progresu” de les tecnoloxíes dixitales de la información, púxennos de manera inevitable p’alantre. El títulu de la muestra fai referencia al cuadru Angelus Novus de Paul Klee, que Walter Benjamin interpretó, como ye bien sabío, como un “ánxel de la historia” paralizáu poles murueques d’un pasáu que s’apilen frente a él mentanto una tormenta lu emburria p’atrás, dende’l paraísu camín d’un futuru inciertu (el progresu).
La esposición, comisariada por Steve Dietz (director artísticu de la 01SJ Biennial) y Christiane Paul (directora del Programa de Graduaos d’Estudios Mediales, New School, NY; comisaria axunta de New Media Arts, Whitney Museum of American Art), incluye 29 obres realizaes por 27 creadores y equipos d’artistes.
Los proyectos preséntense, como nun espeyu retrovisor del progresu, en secciones rellacionaes con cinco temes: los “escombrios” del sieglu XX xeneraos poles guerres y conflictos; les contramidíes de control y represión instituyíes tanto pol Estáu como pol capital global nel so intentu de caltener el control; la estética y el llinguaxe simbólicu de los media del nuestru tiempu; les fuercies de la globalización económica, como les deslocalizaciones o les migraciones; y les posibilidaes de reconstrucción y axencia o capacidá d’acción.
Nel so conxuntu, los proyectos espuestos en Feedforward dibuxen una imaxe complexa de les fuercies polítiques y sociales globales que nos puxen escontra’l futuru. La muestra incluye tanto los aspectos problemáticos del presente y del futuru, como’l potencial pa l’acción colectiva y responsable. Nel momentu más dramáticu de la crisis económica mundial actual, Feedforward propón, precisamente, una llimpieza de lo que queda del sieglu XX y llanza una pregunta: ¿qué ye’l progresu güei?