De magar s’inventaron, los ordenadores usáronse como motores de xuegu. Una parte grande de los primeros xuegos d’ordenador programáronlos investigadores y científicos cola mira clara d’avanzar na investigación tecnolóxica. El deséu de crear una esperiencia participativa (y, por supuestu, prestosa), más que contradicir, acabó facilitando los oxetivos más ambiciosos. Na última década, los avances cada vez mayores nes funciones de conexón de redes, procesáu de dispositivos y simulación de los ordenadores, col desenvolvimientu d’interfaces nueves y intuitives, estimularon la introducción de formes nueves de xuegu. Esos fenómenos acompañáronse d’un resurdimientu del interés pol estudiu y la teoría del xuegu y d’una conciencia mayor del papel fundamental del xuegu na cultura, la educación y les industries creatives.
Playware recueye la obra d’una riestra d’artistes, diseñadores y inxenieros qu’esploren les llendes y enanchen les posibilidaes del xuegu interveníu dixitalmente. La esposición establez un continuum ente dos clases d’obres:
1) Les instalaciones d’arte interactives pa dellos xugadores qu’afonden, davezu en forma de xuegu, métodos nuevos d’interacción lúdica cola información dixital
2) El software de “xuegu artísticu”, concebíu pa ordenadores y plataformes de xuegu comunes que s’estremen de les sos versiones más comerciales polos sos entornos animaos surrealistes, arbitrarios y abstractos.
En dambos tipos d’obres sobresal l’énfasis na duración indefinida y nel calter participativu, colos xugadores convertíos a menudo en creadores (compositores, pintores o animadores), n’elementos integrantes de la esperiencia. D’últimes, l’enfoque minimalista de los gráficos y de la narrativa de les pieces espuestas dexa descubrir los mecanismos que s’escuenden nel xuegu dixital, convirtiendo les obres n’auténticos oxetos d’investigación creativa y lúdica.