Pasajes. Viajes por el híper-espacio ye una selección d’obres pertenecientes a la colección Thyssen-Bornemisza Art Contemporary (T-B A21). Integrada fundamentalmente por instalaciones y obres escultóriques de gran escala, la esposición concibióse pa estimular un percorríu contemplativu, reintroduciendo al espectador nel centru mesmu de la esperiencia artística; un viaxe inmersivu a otra dimensión perceptiva qu’activa lo físico, lo sensual y lo cerebral.
Si tradicionalmente l’arte encarnó una representación del mundu qu’habitamos centrándose na capacidá visual, los artistes del nuestru tiempu oriéntense más pa una reescenificación de fragmentos del nuestru entornu cola mira d’orixinar cambeos na nuestra comprensión qu’apelen a la totalidá de los rexistros sensuales y corporales y que descompongan los paradigmes del suxetu vidente y del oxetu de la percepción. Al esplorar formes perceptives qu’entretexen lo “real” colo “virtual”, dan pie a delles esperiencies estimulantes que desaten lo imprevisto y lo impredicible; quier dicise, aquello que nun ye esplicable o representable dafechu dende conceptos o espectatives preexistentes.
Trátase d’un horizonte vivencial nuevu frutu de procesos d’aceleración, de l’adaptación a les tecnoloxíes nueves, de la capacidá d’enfrentase al cambéu y a la innovación. Y anque la nuestra esperiencia del mundu atópase cada vez más mediada, el nuestru sentíu de lo real vese inclusive más distorsionáu polos fluxos d’información –d’imáxenes, testos o soníos– que nos lleguen de contino al traviés de toa clas de dispositivos en rede. Pa facenos idea de la complexidá del mundu nun basta yá una observación detenida del mesmu; parámetros non tan fáciles de descifrar proponen un desafíu total a esa idea. De dalguna manera, l’arte suxer una matriz nueva pa la comprensión y rellación col nuestru entornu. Les obres d’arte finxen una dimensión narrativa que combina con llibertá la realidá y la ficción: una especie de realidá espandida.