Arte y pirotecnia
Noches eléctricas garra’l nome d’una película del 1928 d’Eugene Deslaw, na qu’esti últimu escenifica, como nun espectáculu de pirotecnia, la illuminación nocturna, los lletreros de neón y los escaparates de París, Berlín y Praga. Igual que los fueos artificiales, el cine ye una proyección intermitente y efímera de lluz na escuridá. Al traviés d’una escoyeta d’obres de la colección del Centre Georges Pompidou, la esposición tenta de demostrar, colos recursos visuales de la pirotecnia, la continuidá qu’existe ente los espectáculos de fueu y l’arte de les imáxenes en movimientu: flores, estrelles, agua, fueu, tormentes, fontes, volcanes…
La esposición empieza con una serie de grabaos franceses de la dómina clásica y d’estampes xaponeses que representen fueos artificiales, amás d’un conxuntu de semeyes qu’introducen una selección importante de películes esperimentales y d’obres contemporánees de Brion Gysin, Ange Leccia, Ana Mendieta, Yoko Ono, ente otros.
Presentada en planu abiertu y concebida tanto a manera de paséu y entretenimientu, como d’esposición clásica, la muestra funciona conforme al principiu de los fueos artificiales, alternando instalaciones con proyecciones. Les imáxenes en movimientu preséntense en pantalles de formatos distintos que cuelguen, a altures diferentes, nel espaciu. El principiu de visión horizontal resulta asina alteriáu y percorremos la esposición como si asistiéremos a un espectáculu de fueos artificiales: mirando pal cielu.