«Los xuguetes nun son tan inocentes como paecen. Los xuegos y los xuguetes anticipen idees importantes».
Charles Eames
Nos diez últimos años multiplicáronse les iniciativas dende’l mundu del arte, la investigación académica y la industria buscando establecer el status del videoxuegu como mediu, y reclamar les posibilidaes de lo lúdico como estratexa creativa. LLABoral ayudó a esti procesu cola triloxía d’esposiciones Gameworld, Playware y Homo Ludens Ludens, quiciás la esploración más fonda del tema dende una institución cultural.
Agora que l’interés de los artistes pol videoxuegu dexó de sorprender; agora que munches universidades cunten con departamentos de Game Studies y el movimientu de los Xuegos Independientes ta alcontrando un espaciu y un públicu propio, ¿cuáles son les llendes nueves del xuegu como llinguaxe y como industria?
Arcadia: Juegos desde una cultura de la Innovación ye un observatoriu que sondia les llinies d’investigación principales que se siguen anguaño en tolos ámbitos de la cultura lúdica contemporánea; del diseñu de xuguetes al desenvolvimientu independiente de videoxuegos, pasando pel gameart y los llamaos ‘xuegos serios’.
Los más de trenta proyectos escoyíos, producíos los más d’ellos nos trés últimos años, son muestra d’una sensibilidá emerxente que trespasa les nuestres idees preconcebíes sobre la función y forma del xuegu.
Xéneros nuevos como los «xuegos lentos» de Tale of Tales, qu’eviten l’adrenalina y busquen somorguianos n’atmósferes envolventes. Estudios y diseñadores como Jason Rohrer y Thatgamecompany, que los sos xuegos emocionales y turbios asítiense acullá del imaxinariu adolescente de los videoxuegos comerciales. Esperiencies sensuales antinarratives, como l’escepcional Eliss de Steph Thirion… y xuegos qu’editorialicen y comenten sobre les crisis contemporánees sociales, polítiques y medioambientales.
Acullá del software, Arcadia adiéntrase en territorios como’l diseñu de productu y gadgets, el xuguete y la cultura de l’autoconstrucción y el hacking lúdicu.
Arcadia ye la primer presentación dientro de Mediateca Espandida, un espaciu nuevu de LLABoral qu’esperimenta con formatos de presentación nuevos que fomenten la sociabilidá y vaigan más allá de la esposición tradicional.
Presentación institucional de la esposición Arcadia
Ún de los retos y de los llogros del arte contemporaneu ye que tresciende de los formatos clásicos, físicamente acotaos poles dimensiones del espaciu y del tiempu, sometíos al discurrir cronolóxicu. De la mesma manera, el procesu evolutivu del arte foi pasu ente pasu rompiendo coles regles tradicionales y los cánones clásicos, siendo quién a eliminar la distancia ente espectador y la obra artística, hasta llegar al estadiu de disolución, inclusive, del conceptu mesmu de “obra”, entendida como realidá apalpable y inalteriada.
Arcadia ye un pasu acullá, ye un apueste vanguardista y atrevíu nel que lo lúdico ye esperiencia artística, l’espectador ye protagonista teatral, la cai ye’l llenzu, la ciudá ye l’itinerariu artísticu y ye l’arte en sí mesma. Ferramientes y instrumentos estremaos son la trama cola que los ciudadanos faen arte: fotografía, telefonía móvil, mensaxes, videoconsoles, GPS… La tecnoloxía nueva como artiluxu artísticu.
Pa Cajastur participar nesta iniciativa ye, polo tanto, una satisfacción, polo que supón d’atrevencia, d’esploración del universu artísticu y d’ufierta a los ciudadanos d’esperiencies nueves. La persona como protagonista y partícipe del arte ye un horizonte pal que ye menester facer un camín del que Cajastur quier participar, porque, precisamente, esi ye ún de los oxetivos de les actividaes socioculturales de la nuestra entidá: llevar l’arte al ciudadanu, facer que les manifestaciones artístiques lleguen a tolos requexos de la nuestra rexón y facer partícipes de la cultura a la sociedá nel so conxuntu.
Ye verdá que, y asina tien pasao históricamente, la vanguardia provoca refugos, pero nun ye menos cierto que cuando la participación ye la exa vanguardista ye atracción lo que se favorez. Cajastur tien el convencimientu de qu’esta iniciativa va ser un finxu na evolución del conceptu artísticu y de la busca permanente que significa’l trabayu creativu.