Tengo que renovar la forma ontolóxica de la música. Nam June Paik
Nel trescursu del sieglu XX, la música tien funcionao a menudo como fuercia motriz d’innovaciones fundamentales nes artes visuales y como puntu de partida pa munchos artistes. Ensin escaecer el papel que desempeñó nel desenvolvimientu del arte abstractu, foi sobre manera na década de los sesenta cuando la música demostró ser un terrén abonao pa enfoques nuevos, teoríes nueves, formes d’arte nueves y estétiques nueves. El músico John Cage collaboró con artistes y inxenieros. La primer performance de la historia, l’Acontecimientu Ensin Títulu representáu nel 1952 nel Black Mountain College, foi un acontecimientu musical, como tantos otros de los eventos de Fluxus que diben facese yá na década de los sesenta. Ye más, el movimiento Fluxus diba recurrir a la notación musical pa les sos “partitures” singulares. Pensar musicalmente foi lo que llevó a Umberto Eco a introducir, la primer vez, el conceptu de “opera aperta”, y na base mesma del videoarte atopamos la manipulación de la señal electrónica, que Nam June Paik esperimentó la primer vez con música.
Playlist ye una esposición que nagua por esplorar el papel desempeñáu pola música na adopción y manipulación, dende mediaos de los noventa, de tecnoloxíes dixitales y analóxiques obsoletes: vinilu, ordenadores vieyos, plataformes de xuegos y asemeyaos. Paeznos, per una parte, que la cultura de la música electrónica foi clave nel desenvolvimientu del arte medial low-tech y domésticu y, per otra, que, como nos principios del videoarte, la manipulación del fluxu dixital surde, principalmente, de la investigación musical.
El nucleu de Playlist va ocupalu la esploración del “movimientu 8bit”, surdíu de la manipulación de tecnoloxíes de xuegos obsoletes pa crear instrumentos nuevos colos qu’interpretar música. La esposición va demostrar la necesidá de contemplar el retro game nes artes visuales como la manifestación d’un fenómenu de mena fundamentalmente musical, que nunos cuantos años va espardese pel mundu al traviés de festivales y clubes, siendo quién dacuando a influyir a grandes músicos establecíos; y que la investigación visual y la musical evolucionaron per caminos paralelos, en busca de soníos y estétiques de baxa resolución y de notes y colores sintéticos. Pela primer vez, vamos facer l’análisis del retro game al traviés del prisma de la producción y distribución musical, mostrando non sólo temes, sinón tamién instrumentos, ferramientes, softwares y hardwares, carátules y gráficos, amás de discografíes, plataformes y comunidaes. Con eso, vamos llograr que Playlist seya puntu de partida d’un archivu / colección de materiales xeneraos por artistes y músicos, y un contestu rellacional onde los visitantes puedan practicar con ferramientes producíes por artistes y participar en talleres, conferencies y performances improvisaes.
Pero amás de too eso, con Playlist vamos tentar d’ufiertar un entornu, non necesariamente basáu nel xuegu, pa esa clas d’investigación, escoyendo aquellos proyectos y artistes que foron fundamentales pa la construcción del marcu conceptual que fixo posible’l desenvolvimientu del retro game.