A Perfect Day recueye’l desenvolvimientu d’un día normal, al traviés de la mirada de fotógrafos del colectivu Los Purificados. El pasu de les hores, sitios y estaos de la mente, llevantase, trabayar, viaxar, el placer, el golor del sexu, el mieu, la soledá y la muerte son dalgún de los temes qu’encara esta muestra que se va esponer n’Almacén Sur hasta’l día 24 de agostu. Almacén Sur ye un espaciu onde’l Centru d’Arte quier dar acoyida a artistes y colectivos que trabayen al marxe de los circuitos comerciales habituales. A Perfect Day incluye 48 semeyes, montaes en soporte ríxidu ensin enmarcar dientro d’un collage-mural xigante que va recubrir les parés del espaciu, formando una instalación onde se conxuguen les semeyes de la serie y l’arte muralísticu d’artistes del colectivu.
Mentanto, nuna parte de la paré del Almacén Sur van proyectase, de contino, audiovisuales de producción propia de los artistes del colectivu que narren la historia, nacencia y desenvolvimientu de Los Purificados dende los sos oríxenes.
Esta esposición-instalación propón una radiografía de la realidá artística actual. Los Purificados dibuxen les idees y formatos nuevos asumíos por colectivos d’artistes que quieren demostrar que ye posible establecer comunidaes d’artistes que trabayen pa que l’arte seya públicu y de baldre pa toos, a pesar de la rixidez del sistema y les oportunidaes escases que tienen los creadores individuales p’abrise un güecu nel mundu del arte. Nel trescursu de los primeros díes de la muestra, dellos de los artistes del colectivu van tar presentes en LLABoral p’abrir un debate sobre’l problema del accesu al arte por parte de los artistes y públicu.
Los Purificados ye una comunidá de fotógrafos y artistes independientes que naz n’España en mayu del 2007 cola mira de reflexonar sobre’l conceptu del arte y los sos axentes implicaos (críticos, galeristes, instituciones, artistes). Tenta de xenerar un accesu llibre al arte por parte del públicu y de los sos creadores. Como’l so nome indica, Los Purificados quieren reflexonar sobre esta idea; ¿namás son Purificaos quien pueden xulgar l’arte de los otros, o los verdaderos Purificaos son los que tán percima de cualquier prexuiciu, políticu, social y económicu? Anguaño cunten con dos vertientes artístiques: el Colectivu Artísticu Los Purificados abiertu y públicu, con más de 200 artistes de procedencia nacional y internacional, y l’Asociación de Fotógrafos y Artistes Independientes Los Purificados, que tien 30 socios miembros.