Biografía del cuerpu clínicu y del cuerpu humanu; un homenaxe a Henrietta Lacks.
El proyectu esplora la forma na que les ciencies biolóxiques persiguen un afán d’inmortalidá y trescendencia a la muerte, que se pon de manifiestu nuna instalación y al traviés de la puesta n’escena del ensayu clínicu y del ensayu de la danza. Quier abrir una reflexón alredor de les polítiques, derechu y propiedá del cuerpu y los avances de la investigación médica y biolóxica, al empar que rindir homenaxe a Henrietta Lacks.
La instalación proyecta imáxenes de célules epiteliales humanes conocíes como “HeLa”. Esta llinia celular provién d’Henrietta Lacks, una muyer afroamericana nacida n’Estaos Uníos a quien, enantes de la so muerte en 1951, sacáron-y célules del cuerpu ensin el so consentimientu. Éstes foron les primeres célules humanes que podíen desenvolvese nun llaboratoriu y tovía anguaño s’usen en munches investigaciones biomédiques. La historia d’Henrietta Lacks muestra los cuestionamientos llegales y éticos colos que tien que s’encarar la investigación en biomedicina. Paralelamente, muéstrase la filmación de la baillarina Sonia Gómez n’estáu avanzáu d’embaranzu nún de los sos ensayos. Trátase d’una puesta n’escena del procesu de construcción d’una coreografía improvisada nun momentu concretu de la biografía de la baillarina. Si, per una parte, les ciencies biolóxiques presenten el cuerpu humanu como compuestu por partes separaes y separables y configuren una intercambiabilidá de los órganos ensin referencia a la unidá corporal, el trabayu de la baillarina ayuda a reconstruyir esi cuerpu como un tou, poniendo de manifiestu la continuidá de les sos funciones vitales.