¿Cómo interactúen los términos «guapura» y «cultura» dientro de disciplines como la historia del arte, la filosofía, los estudios culturales o l’arquitectura? El modelu espresionista al que nel pasáu avezaba a recurrise pa contestualizar esa clas d’interrogantes convirtiendo la cultura n’espresión d’una comunidá particular muéstrase cada vez más mal amañosu p’analizar les munches diferencies que se dan ente toles comunidaes y los empréstamos continuos en toes direcciones que se dan dientro de cada grupu cultural.
Como consecuencia de los cambeos provocaos pola tresculturalidá, atopámonos metanes d’una encruciyada de fuercies globalizadores, qu’en dellos casos impiden dalgunes formes de vida cultural y n’otros son responsables del so surdimientu. Pero, ¿cuálos son los oxetivos de la cultura nun mundu globalizáu? La respuesta que deamos a esta pregunta va determinar el nuestru comportamientu como artistes y como ciudadanos.
Nel marcu de los grandes cambeos culturales que se dan n’Europa y el mundu güei, el conceptu de guapura y de lo guapo nes artes visuales quedó marxináu. ¿Por qué razón? Nun movimientu paralelu al de la xente que percuerre’l mundu d’un llau a otru, la guapura dexó de ser un tema de discutiniu en foros públicos o artísticos. Munches veces, atopamos el términu «guapura» vinculáu a revistes de moda, al nome d’una estrella de Hollywood o a un productu cosméticu nuevu. El descubrimientu d’atributos visualmente prestosos o positivos nun ye una cosa recurrente en críticos, escritores o periodistes d’arte del nuestru tiempu.
Vivimos nun mundu centráu nel individuu y nes problemátiques de lo individual. La muestra nagua por formular interrogantes tan urxentes como qué ye la guapura, la so importancia dientro de la nuestra existencia cotidiana o la capacidá de les obres d’arte guapes pa llevantar l’espíritu del espectador. De la mesma manera, tenta d’aclariar dalgunes de les sutileces del conceptu de guapura recurriendo a delles definiciones de la palabra a cargu d’un grupín de creadores internacionales procedentes d’España, Francia, el Reinu Uníu, Estaos Uníos y Tailandia, interesaos en mostrar la unidá de visión de los artistes y el so compromisu cola esploración de papeles nuevos y activos pal artista dientro de la sociedá.