Una mirada matemática
La idea na que se basa la esposición RSME-IMAGINARY ta n’usar los componentes estéticos y visuales de les Matemátiques como estímulu pa esplicar a los visitantes el conteníu matemáticu implícitu d’una forma tanxible y interactiva. Ilústrase lo imaxinario y lo (aparentemente) inimaxinable de les Matemátiques, pa lo que se recurre a imáxenes qu’ún mesmu pue crear.
La esposición ye una adaptación sofitada pola Real Sociedá Matemática Española (RSME), como una de les iniciatives variaes pa celebrar el so centenariu, de la esposición IMAGINARY del Institutu d’Investigación Matemática d’Oberwolfach, Alemaña, que se creó pola mor del Añu alemán de les Matemátiques (2008).
RSME-IMAGINARY consta, per una parte, d’una galería d’imáxenes guapes y interesantes basaes nes matemátiques. Suspendíes d’una estructura d’aluminiu reconfigurable d’alcuerdu coles necesidaes de les sedes, cada imaxe ta acompañada d’un panel qu’esplica dalgunes de les sos propiedaes, como pueden ser singularidaes y simetríes. Tamién se fai referencia a aspectos estéticos, históricos o científicos. La mayor parte son debíes a Herwig Hauser, de la Universidá de Viena.
Diez d’estes imáxenes espónense tamién como oxetos 3D nuna vitrina. Estes escultures delicaes y esquisites llográronse con una impresora 3D gracies a procesu ellaboráu onde xueguen un papel indispensable les matemátiques, los algoritmos y la informática.
Tolos los materiales espuestos son el resultáu d’un esfuerciu colectivu internacional, y en particular de la RSME. Los creitos a los sos protagonistes documéntense con detalle dientro de la esposición acullá de les referencies curties nesta introducción.
Les pantalles interactives
Per otra parte, RSME-IMAGINARY ufierta dellos programes interactivos de visualización matemática. Estos programas faciliten la esploración autónoma o guiada d’un universu abondosu de formes guapes y pueden usase nos centros d’enseñanza o polos particulares. Pueden descargase de baldre de www.rsme-imaginary.es
La más central ye la pantalla de Surfer, un programa col que se pueden dibuxar y manipular superficies alxebraiques en tiempu real. Nuna pantalla táctil los visitantes pueden, colos sos propios deos, tecliar o cambiar ecuaciones polinómiques, modificar el valor de parámetros con cursores deslizantes, esperimentar colos sos colores o xirales en toes direcciones. Surfer ta basáu y construyíu sobre’l programa Surf de Stephan Endrass y desenvolvióse a costafecha pa la esposición IMAGINARY por Henning Meyer, de Kaiserslautern, y Christian Stussak, de Halle, cola collaboración d’Oliver Labs, de Saarbrücken.
Con Morenaments pue esperimentase con mosaicos nel planu. Hai exactamente 17 maneres distintes de construyilos y caúna d’elles correspuende a un grupu de simetríes o de movimientos del planu. Na pantalla pue escoyese ún cualquiera de los grupos, amás de pinceles de colores. El dibuxu realizáu en cualquier parte del área gráfica de la pantalla repítese creando un mosaicu que depende del grupu escoyíu. L’autor de Morenaments ye Martin von Gagern (www.morenaments.de).
Nun entornu de realidá virtual controláu como si fore un xuegu de consola, jReality dexa a los usuarios movese en rellación al oxetu seleccionáu, introducise nél, percibilu como si fore un oxetu real. Desenvolvióse na Universidá Técnica de Berlín por Ulrich Pinkall y el so grupu.
El quioscu Cinderella, debíu a Jürgen Richter-Gebert, de Múnich, preséntase n’otra pantalla. Da accesu a 35 axentes interactivos bien interesantes sobre funciones, simetríes, fractales, muarés, xeometría, o simulaciones físiques virtuales. Na mesma pantalla pue accedese a 3D_XplorMath, un programa con un repertoriu estensu de posibilidaes pa visualizar y estudiar oxetos matemáticos, sobre manera curves y superficies. Oxetos, animaciones y posibilidaes a esgaya conviden al usuariu, inclusive cola opción d’usar gafes 3D. Desenvolvióse pol consorciu 3D_Xplor_Math.