Crisálidas ye una construcción mental qu’usa esti conceptu biolóxicu como metáfora y puntu de partida organizativu d’un universu de socedíos y emerxencies fragmentaes en tresformación, convidándonos a una arquitectura de recreaciones instintives y automátiques, paralela a estaos mentales débilmente conscientes o inconscientes, ente atmósferes envolventes de presencia y perda simultánea.
Crisálidas respuende a un procesu de collage articuláu onde intervienen imáxenes cotidianes procedentes de dellos medios de comunicación masivos, reproducíes a partir d’un dibuxu intuitivu, y vueltes a rexenerar al traviés de superposiciones y alcuentros casuales ente otros dibuxos creaos de manera análoga.
La esposición, nun ensuañu envolvente, de lo cotidiano a lo trescendente, organiza un paisaxe mental de condensaciones bien rares dende’l mundu real, que, ampliando la diversidá xenética, da forma a otros mundos inesploraos, híbridos, poéticos y metafóricos de la nuestra capacidá de ser.
Dende una perspectiva emocional, sensitiva y dacuando lúdica, estes imáxenes enllaciaes y reabsorbíes, defendiendo la delicadeza de lo inesperao, fusiónense y superpónense recreando delles variantes abiertes a toa una serie de posibilidaes retroalimentaes, constituyendo una visión parcial y suxetiva d’una sociedá onde les señes d’identidá s’alcuentren en mutación de contino.
En bioloxía, imagu ye l’últimu estadiu del desenvolvimientu de la metamorfosis d’un insectu, yá seya dende la ninfa (metamorfosis incompleta) o depués d’emerxer de la crisálida (metamorfosis completa). Crisálidas permite’l trance d’un dibuxu que s’alteria, al traviés de les metamorfosis incompletes de la imaxe, la ninfa d’imago, en términos non esclusivamente biolóxicos.
Asina, dende una xestación accidental de sustratu oníricu, desenvuélvese Crisálidas, dexando que lo continxente, lo alusivo, pueda convertise en forma, ensin orde formal impuestu.