La obra cuestiona la percepción del espectador sobre la veracidá de lo que se-y muestra, trazando un percorríu qu’empecipia cola observación d’una serie de videos d’imáxenes sintétiques y que remata col alcuentru con un oxetu físicu y interactivu. Esti ta formáu por fluxos d’información, por tresmisiones de lluz y de soníu.
Nel contestu d’esta obra nun se trata tanto de responder a preguntes filosófiques fundamentales del tipu: ¿Cómo se pue controlar el desenvolvimientu tecnolóxicu y sobre qué base ética tenemos qu’escoyer les sos finalidaes? ¿Quién tien el derechu de dictar la empresa definitiva de les máquines? ¿Son les máquines quién a destruyinos? Al contrario, esta instalación reformula estes preguntes filosófiques modernes usando imáxenes propies de la cultura popular de la ciencia ficción.
La escultura respuende a la presencia, muestra una voluntá de comunicación. La interacción y los comportamientos que resulten son una imitación de la intelixencia artificial. Espresen cómo normes percencielles pueden xenerar comportamientos aparentemente complexos. ¿Cuál ye’l so grau d’intelixencia? ¿Ye un instrumentu de comunicación? ¿Cuála ye la so autonomía? ¿Vive? ¿Ye?
Esta instalación renueva asina un fondu cultural vieyu, entruga les llendes de la nuestra concepción sobre la intelixencia artificial y derruempe nel nuestru imaxinariu colectivu de la ciencia ficción.