La propuesta espositiva de FEEDBACK céntrase nel arte que respuende a instrucciones, a inputs o al so entornu, ufiertando una posibilidá narrativa a la multiplicidá d’histories del arte qu’echen mano de la tecnoloxía dixital como soporte. FEEDBACK enllacia dos temes vinculaos al arte “reactivu”: ún qu’indaga nel conceptu de feedback dende la creación artística basada n’instrucciones (llinguaxe natural o codificáu) hasta algamar l’arte que proponen los sistemas abiertos que reaccionen a los inputs del esterior; l’otru esplora’l conceptu de la lluz y la imaxe en movimientu dende la imaxe cinética y l’Op art hasta les propuestes reactives de la televisión y el cine. FEEDBACK entellacia estos temes para ilustranos alredor de la interconexón y influencia mutua de les práctiques artístiques variaes que se desenvolvieron a lo llargo d’estos últimos cincuenta años. La muestra nun quier facer un repasu históricu, sinón mostranos una selección d’obres sorrayando la forma na qu’idees diverses rellacionaes ente sí s’espresaron en delles coxuntures históriques. Les obres nun s’esponen n’orde cronolóxicu sinón en conxuntos temáticos o pareyes ramificaes y interconectaes.
TELEMATICA Y CONEXONES GLOBALES
Los artistes valiéronse de faxes, teléfonos y inclusive de la TV per cable p’aquelles creaciones que impliquen ubicación remota. L’orixe del términu “telemática” remóntase a 1978, cuando nun informe empobináu al entós presidente francés Giscard d’Estaing, Simon Nora y Alain Minc acuñaron esi términu pa referise al usu combináu d’ordenadores y telecomunicaciones. Valiéndose de “tecnoloxíes nueves”, como’l videu y les retresmisiones vía satélite, los artistes de la década de los setenta empezaron a esperimentar con redes y con “performances en vivo” adelantándose a les interacciones que na actualidá se dan n’Internet. Les tecnoloxíes dixitales y Internet proporcionaron posibilidaes enantes enxamás vistes de “tar presentes” en dellos sitios a un tiempu.
CIBERNETICA, SISTEMES ABIERTOS Y ARTE BASÁU N’INSTRUCCIONES
- CIBERNETICA Y SISTEMES ABIERTOS
Na década de los cuarenta, Norbert Wiener acuñó’l términu “cibernética”, que provién del griegu “kybernetes” y que significa “regulador” o “timonel”, pa especificar el papel clave de la reacción o feedback nos sistemes de comunicación. Nel so llibru Cibernética o’l control y comunicación n’animales y máquines (1948), Wiener define trés conceptos básicos pa cualquier organismu o sistema: comunicación, control y feedback. Ye precisamente dende los años sesenta cuando los artistes empiecen a reflexonar cada vez más sobre los sistemes tecnolóxicos, los sistemes del mundu social y los sistemes estéticos. Agrupaos en movimientos como Fluxus y el Conceptualismu, los artistes analicen sistemes “abiertos” y xenerativos pa crear obres d’arte política y culturalmente reactives.
- ARTE BASÁU N’INSTRUCCIONES
Munches obres d’arte tienen l’aniciu nun conxuntu d’instrucciones. Si nos remontamos a los primeros años del s. XX, vamos atopar creaciones artístiques pertenecientes al movimientu Dada basaes n’instrucciones formales. A principios de los años sesenta, el movimientu Fluxus y l’arte conceptual enfatizaben, como nel casu de los dibuxos murales de Sol LeWitt, una serie de variaciones d’instrucciones formales centrándose nel conceptu, l’acontecimientu y na participación de los espectadores en contraposición al arte imaxináu como oxetu únicu en sí mesmu. Dende primeros de la década de los sesenta, les práctiques artístiques basaes n’instrucciones recurrieron a menudo a procesos computacionales rellacionaos coles pantalles y que diben dende los primeros plotters a les pantalles y les proyecciones dixitales de güei.
ARTE CINÉTICU / ÓPTICU
Dende’l puntu de vista científicu, la cinética defínese como la enerxía qu’un cuerpu tien en virtú del so movimientu. Davezu, l’arte cinéticu, qu’algamó l’apoxéu de mediaos de la década de los sesenta a metá de los setenta, xenera movimientu al traviés de máquines qu’activa l’espectador mesmu. L’arte cinéticu solápase temporalmente col arte ópticu o Op Art de los sesenta, con artistes como Victor Vasarely, Julio Le Parc y Nicolas Schöffer, valiéndose de dibuxos pa crear ilusiones óptiques d’oxetos en movimientu, vibraciones o distorsiones. El términu apaez pela primer vez impresu n’ochobre de 1964 na revista Time, pero les obres que podríen clasificase como Op Art llevaben creándose dende muncho enantes. En bona parte de les instalaciones dixitales actuales ye posible atopar buelgues del arte cinéticu y l’Op Art, qu’esperimentaba con “máquines” xeneradores de lluz y movimientu.
CINEMÁTICA
Dellos aspectos del arte cinéticu y Op Art alcontraron continuidá en formes reactives de televisión y cine dixital creaes dende últimos de los sesenta. Los artistes construyeron imáxenes en movimientu a partir de respuestes xeneraes pol propiu aparatu, como televisores o proyectores que s’activen col movimientu, la manipulación y selección de datos pente medies de software, o sistemes de navegación que dexen a los cuerpos de los espectadores activar imáxenes y responder a elles.