Investigación poética, política y técnica sobre los satélites
Orbitando satélites muestra los resultaos d’un procesu d’investigación empezáu pola Plataforma Cero en mayu del 2011 a partir d’un alcuentru del mesmu nome. En palabres de Mathurin Milan: “Galileo valtó’l xeocentrismu, pero ésti reconstruyóse a sí mesmu por causa de l’ambición imparable de conectividá, representada nel aniellu de satélites artificiales xeoestacionarios. La Tierra acaba siendo entós –de nueves– esi oxetu inmóvil nel centru d’un ‘universu’ medial.”
Orbitando satélites propón un exerciciu de visibilización d’estos oxetos que, a pesar de permanecer escondíos al güeyu humanu, exercen una influyencia grande y desconocida sobre la nuestra vida cotidiana. Investígase’l so funcionamientu accediendo a les sos señales al traviés de la fabricación d’antenes y l’usu de sistemes de radio; mostrando cómo los atopar y observalos usando software llibre.
Na tradición de les comunidaes independientes implicaes nel montaxe d’infraestructures d’Información Llibre, axúntense espertos y aficionaos, procedentes de dellos países y cultures, pa proponer una declaración qu’esboce poéticamente un mapa de los usos posibles de sistemes basaos na tecnoloxía de los satélites.
Ye un intentu por invertir la lóxica del panópticu, vixílase a los satélites vixilantes, esplórense les sos implicaciones polítiques como sistema opacu de control, amás de les posibles capacidaes de lliberación, y investígase la so poética con exercicios de visualización y creación p’acceder a una mitoloxía o inclusive una astroloxía nueva. Y, finalmente, diséñase un satélite propiu que va llanzase en globu nel mes
de xunetu, coincidiendo cola esposición.