Electrónica, arte y ecoloxía
Esta esposición recueye la evolución y resultaos del trabayu desenvueltu nel ecoLLAB, un sitiu d’esperimentación na intersección de la electrónica abierta, l’arte y la ecoloxía. Articuláu como espaciu multidisciplinar y abiertu al usuariu, el grupu de trabayu constituyíu alredor del proyectu foi implementando delles iniciatives pa funcionar como puntu d’alcuentru, investigación y participación. Dende la monitorización y construcción d’infraestructures sostenibles a los trabayos de sema o a les intervenciones artístiques desenvueltes nel ámbitu descritu, la esposición visualiza los procesos de trabayu siguíos y los resultaos algamaos hasta la fecha.
L’ecoLLAB tien un calter críticu marcáu contra la pseudoecoloxía como ideoloxía nueva y contra les sos consecuencies fatales. Nesti sentíu, l’ecoLLAB quier llevar a la reflexón sobre la sostenibilidá, los procesos naturales y la capacidá del arte como ferramienta de suxetivación. Cola mira de xenerar dinámiques de rellación cola biosfera y los sos ecosistemes partiendo de la implementación d’ecotecnoloxíes (high-tech y low-tech), apóyase la tresmisión de conocimientos ente los integrantes de los grupos de trabayu y los participantes nes actividaes, apostando pola construcción collaborativa del espaciu.