Investigaciones y fenómenos artísticos.
Estación experimental presenta la obra d’aquellos artistes pa los que la razón del so trabayu ye un impulsu irrefrenable que los conecta cola parte más pura de la investigación científica. Esviándose de les directrices preestablecíes nel arte contemporaneu, estos creadores comparten nel so trabayu della atracción por temes estra-artísticos, polo que pasa dientro del campu de lo real pero tamién nel más allá.
Investigación formal, pseudo-ciencia, ciencia-ficción y socesos paranormales son los terrenos esperimentales onde se mueve y materializa la obra d’estos autores, que nun arrenuncien a la so capacidá d’investigar, y ésta pue espardese fuera de les llendes de la creatividá artística como ye entendida no contemporáneo. Esta busca en terrenos paralelos, qu’abarca de la realidá a la mentira, ye perinteresante y muévese nun circuitu marxinal pola so propia dificultá d’allugamientu. Nun ye lo mesmo un artista interesáu na última tecnoloxía, aplicable a la so obra p’algamar resultaos estéticos, qu’otru con enclín pola investigación onde l’esperimentu ye la obra en sí mesma, y esa investigación convierte l’estudiu del artista en llaboratoriu y campu de pruebes, d’errores y resultaos.
Lo mesmo’l dispositivu artísticu que’l científicu trespórtennos a sitios de cambeos y descubrimientos, yá seya con un propósitu real o imaxinariu. Falamos de la creación como sitiu d’esperimentación, y neso, ciencia y arte tienen un fin común, faciendo esperimentos que cuestionen lo hasta agora conocío, buscando una frontera nueva.
Ciencia y arte comparten tamién una poética común. ¿Ónde se toquen y ónde se separen? Ética y estética son conceptos que los separen y los axunten, puntos de contactu que faen pensar y reflexonar tanto al artista como al científicu. Esti últimu trabaya nun espaciu d’observación maraviyosu a partir del conocimientu, con procedimientos rigorosos p’algamar y recoyer datos. Los artistes derruempen nesti campu acotáu per una vía paralela.
A lo llargo de la historia, una fonte escomanada d’idees investigaes llevaron a grandes coses y a nada. Utopíes y fallos, un gran sitiu común del arte y la ciencia.