El conceptu ‘emerxente’ esplica la totalidá cualitativa de cambeos que son xeneraos espontáneamente por un sistema. Les propiedaes d’esti comportamientu débense a les interacciones ente toles partes diferentes del sistema, quier dicise, nun pueden ser reducíes a componentes individuales. Un comportamientu emerxente ye más que la suma de les sos partes. Esta clas de discursu provién de les ciencies y en particular de los estudios sobre complexidá. Tamién podemos usar esti conceptu dende una perspectiva socio-cultural cuando nos referimos a una conocencia nueva qu’entra nel nuestru contestu. Por exemplu, cuando observamos que rexones o países que nun yeren parte de la cartografía cultural occidental empiecen a rellumar nel mapa, definímoslos como zones o procesos ‘emerxentes’.
Polo tanto, lo ‘emerxente’ comparte dos acepciones que nun se contraponen sinón más bien pueden estructurase en conxuntu. Podemos dicir que lo ‘emerxente’ amplifica los avances culturales qu’usen conceptos de la ciencia y la tecnoloxía pa producir un tipu nuevu d’interacción socio-cultural. La interacción ente l’home y la tecnoloxía fai posible que surdan usos estremaos de los que se concibieren de primeres, procesu que munches veces defínenlu como “flexibilidá interpretativa”. Les formes creatives qu’esploren la ciencia y la tecnoloxía faen posibles propuestes novedoses, tanto a nivel críticu como a nivel del usu innovador de la converxencia de medios onde lo visual, sonoro o táctil re-caractericen la manera en qu’interpretamos los procesos científicos y tecnolóxicos.
Les instalaciones qu’usen soportes tecnolóxicos conformen naturalmente esta converxencia medial. Déxennos interpretar los procesos d’indagación, investigación o especulación qu’asocien la tecnoloxía col texíu social. Visibilicen un procesu de trabayu que davezu ta escondíu. Na vida real atopámonos con productos acabaos, con caminos predefiníos que difícilmente nos confronten con posibilidaes d’alternatives nueves. Les instalaciones mediales faciliten esta indagación tresversal porque son flexibles a munchos tipos d’interpretación. Ye dende la esperiencia personal o grupal como la obra redefine la so forma y el trabayu en procesu avanza y progresa. El muséu configúrase como una zona de ‘tests’ y ‘toca-toca’, un llaboratoriu abiertu qu’ilustra’l procesu d’ensayu y error. En síntesis, les instalaciones proporciónennos un proceso continuu d’esploración que vincula lo social a lo tecnolóxico.
Emergentes propón pescudar nesti procesu y les posibilidaes diferentes d’usu d’artefactos tecnolóxicos pa interpretar el mundu contemporaneu. Rescatamos de cada obra’l procesu de trabayu y la investigación vinculada a temátiques científiques y tecnolóxiques que repercuten na sociedá. Estes indagaciones conformen anguaño más que nunca’l discutiniu sobre l’universu dixital. La medría de la información dixital nel mundu contemporaneu non solo resulta nuna esposición mayor a conteníos y artefactos o na gran migración d’información análoga a dixital. Danse tamién cambeos trescendentales na vida social y económica de les persones. Güei podemos rexistrar y mecer tipos diferentes d’información dixital, pero munches veces nun somos conscientes de les consecuencies d’esta clas de manipulaciones. La interoperabilidá de la información supón formes nueves de control y una tresformación real de la vida privada cola representación dixital. Autómates informatizaos, tanto nel mediu físicu como virtual, paecen anguaño tener vida propia. Las pieces que conformen esta muestra alcuéntrense en campos vinculaos a la robótica, realidá aumentada, vida artificial o semántica operacional; sicasí, quiebren la so atadura cola ciencia al rellacionase col cine espandíu, la tele-vixilancia o la escultura social.
Les instalaciones d’Emergentes nun nieguen esti texíu tecno-social nuevo. Visibilizando’l procesu d’esperimentación in situ faen posible la interpretación flexible del fenómenu en contraposición al consumu tecno-medial unívocu al que tamos güei espuestos.
Emergentes tamién tenta de cuestionar la visión que munches veces se tien del arte que provién d’América Llatina. Anque podemos dicir que l’arte electrónicu d’América Llatina yá nun resulta desconocíu, existen entá munches variantes poco conocíes que s’averen más a procesos d’investigación multidisciplinaria, como ye’l casu de les obres que componen esta muestra. Más que pieces referenciales o históriques, trátase de producciones -nueves o de recién- que destaquen l’aplicación de ciencia y tecnoloxía pa xenerar un diálogu actual col entornu social. Nun se busca una visión aglutinadora o temática sobre la producción d’arte y tecnoloxía y el so vínculu con América Llatina. Lo que se tenta ye de complementar la imaxe parcial del arte electrónicu contemporaneu pente medies d’una gama de perspectives crítiques, dalgunes madures y otres incipientes.
Sicasí, al facer referencia a la esplosión de la información dixital, nun podemos negar tampoco la ubicación xeográfica tan estratéxica d’América Llatina. Los países que comparten l’Amazonía son poseyedores del mayor llaboratoriu de biotecnoloxía del mundu, muncho más importante en términos económicos que la esplotación actual de recursos naturales. Menos del 1 % de les plantes tropicales investigáronse considerando’l so potencial económicu. La biotecnoloxía nútrese de la naturaleza; de toles maneres, ésti sigue siendo un tema poco esploráu. Güei favorezse la información dixital, pero la bio-xenética tien un valor informacional que foi entá poco esploráu n’América Llatina. Emergentes como proyectu intenta activar esti discutiniu.