Colos nunca enantes vistos procesos globales, de colapsu del creitu y de cambéu climáticu como telón de fondu, la esposición el proceso como paradigma indaga na naturaleza de los procesos y de los sistemes procesuales auto-organizativos a nivel cultural y dientro de les artes. el proceso como paradigma defende la idea de que los procesos convirtiéronse anguaño nún de los grandes paradigmes y estratexes creatives dientro del arte y el diseñu contemporáneos en toles disciplines. La muestra revela’l cambéu elemental que se dio dende una cultura basada nel conceptu de manifestación y productu final, a otra fundamentada nel procesu, derivada d’una sociedá en rede, introduciendo, al facelo, una forma nueva d’entender l’arte basada nel procesu, que tresciende cualquier definición previa. el proceso como paradigma vien a suxerir que la creación artística nueva basada nel procesu ye l’arte del sieglu XXI.
Nel contestu de la esposición LLABoral celebróse’l Taller Interactivos? el proceso como paradigma:
Interactivos? el proceso como paradigma ye un taller onde artistes, técnicos y collaboradores trabayaron nel desenvolvimientu y producción de siete de los proyectos que depués formaron parte de la esposición el proceso como paradigma.
Nel trescursu de dos selmanes, Plataforma 0_LLABoral Centru de Producción abellugó dellos equipos multidisciplinares de trabayu, que producieron y investigaron toles propuestes, col asesoramientu conceptual y técnicu de los comisarios de la esposición, profesores y asistentes técnicos. Esti taller tuvo dirixíu por Antoni Abad, Allison Kudla y Roman Kirschner, estos dos últimos artistes participantes na esposición.
Interactivos? parte d’una convocatoria internacional abierta a la que se presentaron 85 propuestes procedentes de tol mundu. D’alcuerdu cola convocatoria, tolos proyectos respuenden a dalgún de los tipos de procesos que se muestren na esposición: procesos automatizaos/en rede; procesos naturales/biolóxicos; procesos sociales.
Diseñu de la Esposición el proceso como paradigma
La esposición el proceso como paradigma retrata l’arte en desenvolvimientu, movimientu y cambéu. La intención del diseñu foi ayudar a los visitantes a interpretar y comprender un tema tan complexu como’l del arte de base procesual evitando cayer na presentación didáctica.
Les 25 obres d’arte heteroxénees dispunxéronse formando unos grupos definíos llixeramente. Ente los factores que determinaron el so allugamientu individual cúntase, por exemplu, la proximidá formal y conceptual ente les obres, pero tamién el llogru de distracción y contraste visual. Depués, eses agrupaciones vagues van asignase a dellos conglomeraos espaciales que llamamos clusters, qu’articulen el conxuntu de la esposición siguiendo un patrón xeométricu inspiráu n’estructures celulares, ufiertando a les obres un telón de fondu d’apoyu (paré pa colgar, illuminación, superficie de proyección, pedestales) versátil y flexible y qu’atiende a les esixencies concretes de cada pieza. Los clusters ayuden tamién a fraccionar la gran escala del espaciu espositivu de forma que les pieces (dalgunes de dimensiones reducíes) nun se ven anulaes pol espaciu que les abelluga.
El percorríu ye llibre y natural, evitando’l modelu de pasillu y sala d’esposiciones convencional y inflexible. L’espaciu intersticial ente los clusters evoca con sutileza una gran avenida dende la qu’acceder a tolos espacios de la esposición. Esta zona central recibió un tratamientu un poco diferenciáu, con unos paneles en caxellu allumaos dende atrás que reflexen la xeometría celular de los clusters. La presentación cuidadosa y precisa del allugamientu y muestra de les obres amiesta un valor teatral a la esperiencia del espectador. L’espaciu resultante compón una atmósfera de traza aborrinada, pela que los visitantes se mueven con llibertá ente los clusters porosos qu’abelluguen les pieces.