Conceptu
El pasado en el presente y lo propio en lo ajeno busca indagar en cómo les pantasmes de la memoria debalen pel presente influyendo na manera en que lu entendemos y construyimos. Avery F. Gordon estudió cómo lo fantasmagórico, dellos fenómenos d’acumulación de memoria, apaécense nel presente con fuercies renovaes. Les pantasmes nun seríen tanto proyecciones físiques, sinón la manera que tien el pasáu de vivir nel presente. El pasáu traumáticu, tan vinculáu al mundu de les apaiciones del más allá de la muerte, vuelve con fuercia al nuestru tiempu. Andreas Huyssen fala de pretéritos presentes y de cómo “ún de los fenómenos culturales y políticos más sorprendentes de los últimos años ye’l surdimientu de la memoria como una esmolición central de la cultura y de la política de les sociedaes occidentales”.
Pantasmes de memoria, entós, son los qu’equí tán siendo convocaos. Non pa un exorcismu, sinón pa qu’al traviés del so recuerdu y reconocencia se produza a lo menos una reparación simbólica de lo silenciao y, polo tanto, reprimío. Lo fantasmagórico sería equí, entós, acumulaciones d’espectros y apaiciones que siguen debalando a la espera de ser una fuercia social de la memoria.
La interrellación ente territoriu y memoria -cómo s’influyen mutuamente y cómo se resignifiquen nun viaxe de dir y volver- ye lo qu’esta esposición quier analizar a partir del trabayu d’una riestra d’artistes perapegaos al terrén y a les sos connotaciones sociales y históriques. L’espaciu -yá seya xeográficu, urbanu, arquitectónicu o mental- ta atravesáu pola memoria, fecundáu por ella. Asina, munchos son los signos que nos falen d’esi pasáu más o menos recién y que, de dalguna manera, espliquen cómo ye’l nuestru entornu. Dalgunos nun son demasiao evidentes, pero permanecen ehí, nuna segunda capa física o nel inconsciente colectivu. Otros, sicasí, de tan comunes, de tanto tar na superficie, pasen desapercibíos al convivise con ellos caldía y al tar la nuestra visión familiarizada dafechu con ellos.
Polo tanto, con esta mira búscase trabayar fondamente nun sentíu doble cola comunidá local: cola artística y con cuestiones rellacionaes cola memoria personal, colectiva y histórica del propiu sitiu onde s’encaxa’l centru d’arte; entendíu “el sitiu” como un territoriu atravesáu pola so memoria y definíu social, cultural y políticamente. Toos estos asuntos seríen inxertaos (d’ehí la segunda parte del títulu) nun contestu global, nel sentíu de que temes paecíos y tratamientos artísticos averaos foron tamién trataos por artistes d’otros contestos.