Donkijote.org, del artista Cristian Bettini a.k.a. P.ankh, la obra ganadora de la convocatoria Dixital_LLAB de LLABoral, ye un proyectu que presenta una vertiente instalativa y otra virtual, perfectamente compenetraes y amás espárdese nel territoriu d’Asturies, ayudando a averar el centru –na so acepción doble- a la periferia. La so fuercia básase na so naturaleza abierta y nes potencialidaes múltiples, que surden directamente de la so interacción col entornu.
El pollín super informatizáu y el so compañeru andante, conformen una obra multidisciplinar, entemecedura de performance, telemática y media art, accesible dende cualquier puntu del planeta al traviés d’Internet y con un espaciu espositivu en LLABoral.
Trátase d’una obra en movimientu y n’evolución de contino, que reconcilia naturaleza y tecnoloxía y crea una sinerxa nueva y un ritmu nuevu ente les dos, al traviés del viaxe, la busca y el redescubrimientu del territoriu dende un puntu de vista artísticu.
Minuto, el pollín, carga con ordenador, modem, GPS y un sistema de plaques solares y Cristian, l’artista, lleva les cámares. L’animal pon instintu y ritmu, y l’home, creatividá, pasión y lóxica. Xuntos constituyen una interfaz atípica ente Asturies y el restu del mundu.
Les sos vivencies y percorríos narraos al traviés de semeyes, rellatos curtios y vídeos conformen un diariu online dinámicu. Sicasí, al revés qu’esperiencies asemeyaes, Donkijote.org ufierta a toos la posibilidá d’intervenir nel desenvolvimientu mesmu del viaxe, participando virtualmente al traviés de la web y físicamente al traviés de la instalación asitiada en LLABoral. Asina, tanto la web como la instalación medren y evolucionen, a lo llargo del viaxe, gracies a les aportaciones del artista y los sos siguidores, y a la interacción ente estos. Una interacción qu’ayuda a marcar el rumbu y el calter del viaxe y a crear filos invisibles ente LLABoral y el so públicu difuso.
La idea ye conformar cartografíes inédites d’Asturias y afondar en formes nueves de vivir la tecnoloxía, estrechando los vínculos ente la realidá física y la virtual y creando la realidá nueva que demanda’l ser humanu contemporaneu.