LLABoral inaugura con Desde mi ventana un nuevu espaciu d’esposición dientro del Centru d’Arte y Creación Industrial, Almacén Sur, empobináu a abellugar manifestaciones artístiques desenvueltes fuera de los calces habituales y entamaes y xestionaes directamente polos propios creadores.
Desde mi ventana ye una esposición colectiva onde se muestra un percorríu per delles localizaciones dende les ventanes de los participantes. Preséntase como un mosaicu d’imáxenes fotográfiques que recueye les visiones personales de lo que vemos dende la nuestra ventana, que nun ye necesariamente la de la nuestra casa. Na muestra créase un percorríu esterior que construye un mapa colectivo particular.
La imaxe dixital convirtió a la sociedá n’espectadora y creadora, la fotografía ta cada vez más integrada na nuestra vida, que se construye davezu de semeyes que vamos captando nel nuestru día a día o nos nuestros viaxes. Desde mi ventana ufierta una muestra singular de sitios: ciudaes, pueblos, places, aveníes, cielos y suelos captaos dende una mirada personal y anónima. Esti anonimatu vese na esposición, yá que les imáxenes namás lleven el nome de la localización.
Coordinao por Laboca, un colectivu que propón dar voz y facer entender la cultura contemporánea dende delles disciplines artístiques a partir de la collaboración intermedia ente artistes y colectivos específicos.