ANUNCIA: Crear bosques ye una obra d’arte y naturaleza viva de calter permanente que pue visitase nel esterior de LLABoral Centru d’Arte
Crear bosques (Piñera, Asturies, 1996…) ye una acción artística, una naturaleza participativa que representa al empar un monumentu y una sociedá. Un monumentu vivu, una sociedá arquitectónica y el fluxu del tiempu que, al traviés del apadrinamientu d’árboles, busca la creación de un gran monte global que s’axunte a los yá existentes.
El puntu de partida fui una videoinstalación que, a manera d’ivernaderu, convidaba a rellenar una ficha apadrinando un árbol. Producíase asina una tresllación del entornu urbanu al natural, tracamundiando realidaes aparentemente antagóniques. Siguiendo estos parámetros iniciales, Crear bosques convirtióse nuna gran acción global que, col trabayu en rede y l’asociacionismu, busca establecer pautes de diálogu y acción: el compromisu individual como forma política o ecopolítica. Otru de los principios ye’l de trabayar con economía de recursos pa convertir el procesu nun ñudu rellacional en medría, dende una óptica tecnolóxica de trabayu en rede, espardimientu y medría sostenible.
L’acción consiste na recopilación de solicitúes d’apadrinamientu/amadrinamientu, la xestión de l’acción –con un llabor importante de los museos, centros d’arte, colectivos y ONG– y la plantación, vuelve a un formatu oxetual al tresformase nun mapa de localización que dexa al padrín/madrina visitar el so árbol nel casu de que quiera. De momentu fixéronse acciones en, ente otros, Asturies, Galicia, Arxentina, Perú, Paraguái, República Dominicana, México y Alemaña.