Diz Eduardo Kohn qu’esti llibru ye un exerciciu d’especulación, nel doble sentíu d’especular: aldovinar y facer ecu. Ponmos delantre un espeyu y un reflexu que fai retornar una aldovinanza. Una cosadiella xabaz, tropical, floriada, densa. La entruga plantega un enigma pero sobre too convócamos a un ciertu mou d’escucha, dexando de llau los esquemes colos que solemos pensar y abriéndonos a lo inesperao.
Los espacios pelos que mos lleva Eduardo Kohn nestes páxines, como les viesques, enrédense, faense más espeses en virtú d’una continuidad ente los diferentes seres humanos y non humanos que moren n’elles y les permunches dimensiones de la esperiencia que lu atraviesen. Los pueblos que’habiten la Amazonia tan nesi diálogu vidable pa col mediu y son quien pa pescanciar sutileces decisives nesa complexa ecología de seres que constitúi la selva -dalgo que-y de lo que ta en falta’l visitante desenraigonáu qu’al mirar el paisax boscosu, ve nel una monotonía–. Atender pa les viesques ye deprender a sintonizar con un presente polivalente y multifacéticu, au yá nun sirven les actitudes dogmátiques o reduccionistes, y por eso esti llibru mos interpela güei a toos con urgencia.
Dinamizao por Llorián García Flórez ya Isabel Lafuente en collaboración col grupu de llectura de l’Asociación de Antropoloxía de Asturies (ASAPE).
Llorián García Flórez ye etnomusicólogu, Llicenciáu n’Historia y Ciencies de la Música y Máster en Música, Comunicación ya Instituciones na España Contemporania, pela Universidad d’Uviéu; amás de gaiteru nel grupu de rock asturianu Dixebra. Como investigador, la so llinia de trabayu céntrase nel estudiu de la voz y de la escucha como medios que los humanos y otros animales desendolcamos col aquel de’afitar vínculos de pertenencia pa colos territorios nos que vivimos.
Isabel Lafuente Mazuecos ye antropóloga, Doctora en Política Científica y Tecnolóxica pela UNICAMP de São Paulo. Asitada ocho años en Brasil, fizo la so tesis sobre proyectos comunitarios y les sos formes de resistencia y producción de conocimientu dende la teoría de los afectos. Fizo trabayu de campu en pueblos indíxenes de Bahía y comunidades ribeirinhas de Belém de Pará y Manaos. Anguaño reside y trabaya en Madrid.
