Esta obra sonora xira alredor del conceptu de la destrucción o deconstrucción de la música. Un réquiem ceremonial dende la destrucción del instrumentu como oxetu simbólicu de la música occidental, el pianu, pol performer. Una trociadura de pianu en do M. Un actu de protesta, la puesta n’evidencia d’un crime lentu, lloñe del suicidiu románticu, que la historia ta cometiendo cola música na so incomprensión permanente y la so manipulación política. Daqué que yá la historia de la nuestra cultura s’encargó d’anunciar al traviés de los surrealistes, Dadá, Stockhausen, Fluxus, Jimi Hendrix o The Who, ente otros munchos… Esti ye’l cuentu eternu de cómo’l pop comió la estrella de la música, que surde como un réquiem violentu de les pistes recoyíes con micros de contactu y xeneraes dende la destrucción a hachazos d’un pianu foroñosu, a manera de performance, siguiendo la idea de la fagocitación del instrumentu por parte de les larves.
Llámense “larves” les fases xuveniles d’aquellos animales nos que’l desenvolvimientu ye cola metamorfosis. Les larves siempre de traza, tamañu, anatomía y fisioloxía perestremada de los exemplares adultos fórmense nesti estáu previu al so maduramientu n’hábitat distintu. Dende estos anti-ambientes Kafkianos, «Las larvas» tenta de ser un proyectu abiertu, una idea n’evolución alredor del esperimentu sonoru na más amplia de les sos acepciones, que navega nel caos aparente de disonancies deconstructives, alredor de pieces úniques, con un calter conceptual y dramáticu marcáu.
Las Larvas (Arantxa Hernández, Fernando Oyagüez, Jesús García Coronado y Paco Nadie) cunten nesta ocasión cola collaboración de Jandro Gallego y Jorge Álvarez.