La esposición “Cambio Climático: Ideas y miradas desde Iberoamérica” presenta les meyores obres escoyíes a partir de la convocatoria del premiu homónimu entamáu pola Organización d’Estados Iberoamericanos (OEI) y el Centru d’Investigaciones Enerxétiques, Medioambientales y Tecnolóxiques (CIEMAT) y patrocináu pola Axencia Española de Cooperación Internacional pal Desenvolvimientu (AECID).
D’ente les más de trescientes obres recibíes de toa Iberoamérica, ente semeyes (categoría “Miraes”) y artículos d’espardimientu científicu (categoría «Idees»), el xuráu seleccionó pa esta esposición un mosaicu de retratos y propuestes locales sobre los problemes climáticos globales.
El fallu fíxose públicu’l día 26 de setiembre del 2009 nel marcu de la consulta ciudadana World Wide Views on Global Warming (WWViews) celebrada tamién en LLABoral Centru d’Arte y Creación Industrial. Los ganadores foron Amparo Vilches y Daniel Gil (España) col artículu El cambio climático y el chocolate del loro na categoría Idees y Julissa de los Ángeles Morales Pérez (Nicaragua) na categoría Miraes cola semeya titulada Escapando del peligro. La alternativa única.