Obsoletos ye un proyectu creau y producíu por Basurama pa la investigación, creación y espardimientu de sistemes creativos de tresformación de residuos tecnolóxicos, entendiendo como talos tou aparatu electrónicu, soporte d’almacenamientu o hardware que col tiempu quedó en desusu o estropiáu.
El formatu ye la forma de la información. La evolución que nos llevó de los discos de vinilu a les tarxetes de memoria nun ye nin casual nin bienintencionada. Cada sociedá codifica les sos creaciones -yá seyan arte, prensa o entretenimientu- nos formatos vixentes y populares. Pela so parte, industries diverses -les de conteníos y informática principalmente- esfórciense en renovar estos formatos cada ciertu tiempu, baxo promeses de capacidá mayor en tamañu menor a preciu mayor. Cierto ye que cumplen, pero con cada renovación masiva de formatos piérdense miles d’obres non demasiao populares, que nun lleguen a interesar a nadie pa la so actualización al formatu nuevu.
El lector universal de formatos ye una máquina ideal inexistente que pue lleer cualquier papel, cinta, carrete, tarxeta o discu qu’almacene información, y traducilo a cualquier otru llinguaxe. Con esti averamientu posibilista, Basurama considera que la codificación dixital de formatos analóxicos ye xera abondo pa poder cola obsolescencia de los conteníos.
El proyectu pa la construcción d’un lector universal de formatos ye un proyectu a plazu llargu pa la construcción d’una máquina que seya quién a reproducir formatos vieyos y dixitalizar la información. Dada la cantidá tan escomanada de formatos d’información qu’existen y los recursos colos que cunta Obsoletos, esti proyectu propónse como una riestra socesiva de talleres y alcuentros onde la máquina amplía’l númberu de formatos que ye quién a leer, ameyora’l métodu de dixitalización o refina’l procesu automáticu de funcionamientu.
El proyectu plurianual LLABmóvil, financiáu pol Plan Avanza nel marcu de l’Acción Estratéxica de Telecomunicaciones y Sociedá de la Información, dientro del Plan Nacional d’Investigación Científica, Desenvolvimientu y Innovación Tecnolóxica 2008-2011 del Ministeriu d’Industria, Turismu y Comerciu. Con esti programa, LLABoral comprométese a ayudar y impulsar la xeneración de conteníos dixitales innovadores empobinaos a favorecer la implantación de la sociedá de la información ente la ciudadanía, y a promover la creación d’espacios abiertos a la innovación al traviés del desenvolvimientu d’alternatives sostenibles orientaes a cambiar el modelu productivu actual cola utilización intensiva de les tecnoloxíes móviles nueves, amás de la constitución de redes de difusión de conocimientu.