Dende primeros de los años 90 banquete_ evoluciona como una rede internacional de charles y acciones ente artistes, científicos, tecnólogos y otros productores de conocimientu. El so oxetivu ye esplorar les converxencies ente los sistemes biolóxicos, sociales, tecnolóxicos y culturales, y afondar nun enfoque sistémicu y tresdisciplinar que cuestione un modelu imperante de pensamientu –antropocéntricu, llinial y dicotómicu– que les consecuencies polítiques, sociales, económiques, culturales y ecolóxiques apelen a un cambéu inaplazable de sensibilidá, de mirada y de comportamientu.
Concebíu y dirixíu por Karin Ohlenschläger y Luis Rico, el proyectu banquete_ axuntó a antropólogos, artistes, arquitectos, biólogos, filósofos, economistes, neurocientíficos o sociólogos cola mira de reflexonar sobre los patrones y procesos de tresformación que rixen los fluxos tanxibles y intanxibles de materia, enerxía y información. Col tiempu, esta rede vertebró y afianzó un entornu de collaboración, formáu por dellos centros d’investigación, producción y espardimientu artísticu y científicu. La motivación común foi facilitar la interacción ente ciencies y humanidaes, y ente éstes y la sociedá.
D’otra miente, banquete_ rastrexa’l binomiu arte-vida a la lluz de los avances tecno-científicos y en rellación colos llinguaxes emerxentes vinculaos a la creación contemporánea. El so campu d’investigación y espresión amplióse dende’l xen al cuerpu, de la mesa a la rede, del espaciu públicu local a la esfera mediática global.
banquete_ ye un intentu de xenerar un procesu de creación colectiva, que seya quién a articular elementos disociaos y de combinar conocimientos, métodos y práctiques estremaes. Surde del retu d’idear y construyir ente munchos un espaciu d’interacción ACTS (Arte, Ciencia, Tecnoloxía, Sociedá) pa investigar formes nueves de creación y tresferencia de conocimientu.
En resume, ye un espaciu abiertu, basáu nuna dinámica complexa que trata de superar la compartimentación secuencial convencional de los procesos d’investigación, formación, producción y espardimientu cultural; un contestu pa practicar un pensamientu tresversal qu’esplore la interacción ente los ecosistemes, la tecnosfera y los universos simbólicos que definen l’imaxinariu de les sociedaes contemporánees.
Antecedentes
Dende la so creación, a primeros de los 90, el proyectu banquete_ céntrase na esploración de les rellaciones ente los sistemes biolóxicos, sociales, tecnolóxicos y culturales. Nel so percorríu banquete_ materializóse nun conxuntu d’acciones y eventos qu’incluye esposiciones y festivales, talleres y debates, simposios y publicaciones constituyendo, al empar, un entornu catalizador de proyectos d’investigación y producción.
Nesti procesu, pue destacase la realización del monográficu agua editáu pola Revista Internacional de las Artes Atlántica, pola mor de la celebración de la Espo ’98 de Lisboa; les dos ediciones del Festival internacional d’Arte, Ciencia y Tecnoloxía cibervisión celebráu na Universidá Rei Xuan Carlos de Móstoles nel 1999 y nel Centru Cultural Conde de Madrid, nel 2002, en collaboración col Ciclu de Ciencia y Tecnoloxía de la Fundación Xeneral de la Universidá Complutense de Madrid; la esposición banquete_03: metabolismu y comunicación, coproducida nel 2003 pol Palau de la Virreina del Conceyu de Barcelona, el Center for Art and Media (ZKM) de Karlsruhe/Alemaña y el Centru Cultural Conde Duque/MediaLabMadrid (MLM) del Conceyu de Madrid; la esposición banquete_05: comunicación n’evolución realizada nel 2005 nel Centru Cultural Conde Duque/MLM y el Gran Canaria Espacio Digital de Les Palmes; el simposiu ACTS_comunicación n’evolución desenvueltu en Madrid nel marcu de la esposición del mesmu títulu.