Esta instalación consiste na creación d’un ecosistema autónomu que reconstruye espacialmente un universu de valores atribuyíos a la productividá y el descansu basándose na contraposición ente mecanismos de producción material y procesos de creación-producción psicolóxicos.
Per un llau, la convención social y económica muéstranos que tenemos que ser productivos nos nuestros trabayos, ser eficientes, reproducir el nuestru entornu, formar parte d’él, ganar perres… Per otru llau, la nuestra condición humana, como parte del universu orgánicu y natural sigue procesos de producción que nun se basen namás nel tiempu de producción útil sinón que precisen del tiempu de descansu, emponderando ésti de manera que garra una función principal na nuestra capacidá de resolución y na nuestra existencia.
D’esta manera, esta instalación invierte la imaxinería propia de los sistemes de producción industriales y económicos pa emponderar, dende una estaya estética y simbólica más averada a la vida agraria, el tiempu llibre y el descansu como partes esenciales d’otra clas de medría personal inherente a la condición biolóxica de la naturaleza humana.
Les acciones humanes convencionales alredor de l’alienación llaboral, los sistemes de producción y la forma de vida qu’impliquen, anulando l’alministración del tiempu mesmu confluyen nesta reflexón sobre’l ritmu vertixinosu de los nuestros sistemes de producción social, la so necesidá y la valoración del descansu como elementu productivu en por sí.