La idea nació cuando Purificación García y l’equipu de LLABoral xuntaron fuercies cola mira de facer una iniciativa que xuntare l’arte, la moda, les tecnoloxíes nueves y el compromisu social. Una collaboración qu’implica a axentes culturales cola mira de financiar proyectos de cooperación y ayuda al desenvolvimientu na India. Alicia Framis foi la escoyida pa dar forma a un proyectu que se materializó nun bolsu con lluz dientro. Lluz d’enerxía, lluz de tecnoloxía, lluz d’esperanza.
Framis decidió que la so collaboración diba nacer na India. Pero non en cualquier sitiu d’esti país tan estensu, sinón nuna de les sos rexones más pobres, n’Uthar Pradesh, concretamente nel pueblu de Dallipur.
Col propósitu de llevar lluz a una comunidá que nel s. XXI mesmu vive entá cuasi a escures, Framis ellaboró una riestra de propuestes pa llevar a cabu la so idea xugando con elementos como LEDS, bateríes solares, dinamos… toos ellos con un mesmu mensaxe: THINKING OF DALLIPUR (pensando en Dallipur).
De priesa, l’equipu de producción de LLABoral púnxose a trabayar sobre les idees d’Alicia. D’esta collaboración nacieron una partida de prototipos especiales y únicos del bolsu que se crearon en collaboración con LLABoral pola mor del so llanzamientu. Nellos reflexónase sobre les tecnoloxíes nueves, l’usu responsable de la enerxía y la sostenibilidá.
Pel so llau, Purificación García trabayó en llevar el conceptu d’Alicia a les sos tiendes. L’equipu d’accesorios dio forma al bolsu creau por Alicia Framis, que se puede adquirir por 59 € na tienda de LLABoral y en tiendes Purificación García.
Trátase d’un modelu d’algodón fabricáu, como nun podía ser d’otra manera, na India. Escoyéronse seis colores estremaos en dos games: los colores de la tierra (Azul, Verde y Beige) y los colores del mercáu de les especies (Fucsia, Naranxa y Violeta). La frase que da nome al proyectu queda allumada por una cinta fotolluminiscente que brilla na escuridá, tal como l’artista lo concibió nel so proyectu orixinal.
Purificación García collabora con Manes Uníes pa que la venta d’esti bolsu ayude al financiamientu d’una de les munches iniciatives que se faen na rexón d’Uthar Pradesh. Llamentablemente, les sos necesidaes van más allá de la lluz eléctrico, centrándose n’infraestructures muncho más básiques y primaries. La lluz d’esti proyectu va ser asina una lluz d’esperanza pa una rexón necesitada.