Visualizar el sonido

30 marzu – 25 xunu 2012

Representaciones del soníu na creación contemporánea

Nel 2007, LLABoral celebró’l primer Festival L.E.V. (Llaboratorio d’Electrónica Visual), que nes sigles rinden homenaxe a Lev Thermen, el científicu rusu padre de los sintetizadores actuales. L’oxetivu principal del Festival yera ufiertar una visión panorámica, ecléctica y cualitativa de la creación sonora electrónica, y la so rellación coles artes visuales. A lo llargo de les sos cinco ediciones, compartió col públicu una escoyeta de los proyectos más interesantes de creadores internacionales que trabayen nesti ámbitu de creación, tanto talentos mozos como artistes yá consagraos.
El Festival L.E.V. ye un espaciu físicu y efímeru, esmolecíu sobre manera pola sinerxa natural ente imaxe y soníu, pola acción en directo, poles influyencies de les vanguardies na creación contemporánea, les rellaciones que s’establecen ente espectador y espaciu públicu, y poles corrientes artístiques nueves surdíes a nivel global rellacionaes cola cultura audiovisual.

Visualizar el sonido comparte esta visión y esparde al espaciu espositivu les llinies d’investigación del Festival. Esta muestra colectiva internacional quier esplorar la síntesis ente imaxe y soníu, les munches representaciones gráfiques y físiques del soníu y la so evolución nel contestu del arte contemporaneu.

El soníu nun se pue separar del finxu que lu funda, que-y da forma: espaciu, vibración, onda, técnica pa la representación, la percepción y inclusive la visualización.
Visualizar el sonido naz cola idea de xenerar un diálogu ente toles pieces que lu componen, abarcando un sieglu de creación alredor de la mesma idea o conceptu: dominar la onda, representala y domesticala, la necesidá de dir acullá d’onde los nuestros sentíos nos faen llegar y que, al fin y al cabu, ye la esencia de tou arte.