Interferencies, alteriadures y cambeos
Imaxinar vida futura nel tiempu presente paez un exerciciu bien difícil. Sobre manera agora, cuando la realidá vien superando toa ficción, cuesta visionar un devenir que nun seya distópicu. L’alteriadura de cuerpos, identidaes y de tou tipu de sistemes sociales, económicos y medio ambientales, caracteriza un presente nel que too ta conectao a tolo otro. Esta rede de rellaciones y interdependencies cada vez más sensibles y vulnerables oblíganos a vivir nun momentu de cambeos y insegurances constantes.
Nestos últimos años, munchos de los proyectos producíos pola Plataforma Europea de Media Art (EMAP/EMARE) visualicen estes perturbaciones sistémiques del orde preestablecíu. Les sos obres traten les zones fronterices d’un texíu social y cultural cada vez más lesionao, esgarrao y somorguiao nun equilibriu fráxil. Les sos propuestes dexen albidrar, y hasta entender, que la pandemia actual amás pue ser consecuencia, y non causa, de lo que ta asocediendo.
A partir de la teoría de sistemes, aplicada a los ámbitos biolóxicu, social, tecnolóxicu y cultural, y conectaos ente ellos, los seis proyectos de la esposición Vida Futura presenten distintes conexones a distintes escales y contestos. El primer grupu d’artistes pon l’atención nes realidaes microscópiques de la existencia.
El colectivu Quimera Rosa trabaya con sangre y clorofila pa investigar les conexones ente la vida humana y la vexetal. Marco Barotti usa cultivos microbianos, amasueles robótiques y sensores pa facer audible la contaminación de los océanos. Y Robertina Šebjanič y Gjino Šutić usen imáxenes científiques p’averanos a los vertíos químicos qu’alterien l’agua dulce y lo soterraño.
El segundu grupu trabaya a escala macro. Stefan Laxness usa dellos dispositivos dixitales pa esplorar el modelu de los montes vecinales, analizando la viabilidá de la restauración medioambiental del territoriu pa impulsar un desenvolvimientu más sostenible.
Anna Ridler aplica algoritmos d’intelixencia artificial pa que coses aparentemente tan naturales como un tulipán, se vean alteriaes na so forma, testura y color, dependiendo de les fluctuaciones del mercáu financieru a nivel global.
P’acabar, el colectivu Disnovation.org avéranos a los iconos, práctiques y dispositivos virtuales nuevos que caractericen los escenarios, cada vez más estremaos y radicalizaos, de les redes sociales y culturales on-line.
Les obres d’esta esposición son frutu de la convocatoria EMARE (European Media Art Residence Exchange), de la plataforma europea EMAP (European Media Art Platform), dirixida a artistes europeos que trabayen con tecnoloxíes nueves. El programa tien como oxetivu fomentar la collaboración ente artistes y instituciones qu’usen estos medios.