Viaje de ida y vuelta

18 avientu 2014 – 15 febreru 2015

Instalación a partir de paisaxes sonoros del tresporte fechu pol Grupo Mapa Sonoru

Viaje de ida y vuelta ye una instalación sonora que quier transitar pelos soníos que se xeneren alredor del tresporte n’Asturies. Omnipresente anguaño nes nuestres ciudaes y, cada vez más, nes zones rurales, el tresporte convirtióse nuna de les causes más determinantes de la modificación del ambiente sonoru de la nuestra contorna. El so impactu visual señalóse yá ampliamente y el so desenvolvimientu tresformó’l paisaxe, l’urbanismu y inclusive les rellaciones sociales de la nuestra dómina. Esti proyectu del Grupu Mapa Sonoru quier facer un averamientu al tresporte dende’l puntu de vista del soníu, un aspectu qu’influye nos seres humanos muncho más de lo qu’imaxinamos.


DIR: el comienzu d’un viaxe inescucháu

El proyectu empobínase a una sociedá que, cada vez más, usa los medios de tresporte, que dexen una impronta sonora na nuestra contorna que davezu escaezse. La instalación quier enmarcar el soníu ambiental, sacándolo de contestu, pa ponelo a disposición del oyente, qu’asina va poder poner l’atención nos ambientes sonoros que’l grupu de trabayu foi recoyendo a lo llargo del añu en sitios significativos. La metá de la esperiencia va tar na sala y la otra metá nel actu d’escucha sollerte que la persona tien que facer.


VOLVER: vuelta al mundu con otros oyíos

L’oxetivu ye que cada visitante complete’l viaxe al esterior con una actitú d’escucha más receptiva. Nel futuru, cualquier contactu con un mediu de tresporte va suponer una oportunidá pa percibilu d’una forma más amplia. Como les esperiencies vivíes en cualquier viaxe, esta actitú va volver na nuestra maleta y va dexanos tener una perspectiva nueva énte la nuestra contorna, onde’l soníu ye’l gran escaecíu.