Universo vídeo_Prácticas experimentales II

6 xunu – 13 ochobre 2013

Cartografíes p’antemanar un movimientu

Universo vídeo avérase a l’actualidá de la producción y difusión d’imáxenes cola mira d’abrir una reflexón sobre la centralidá qu’éstes ocupen nel mundu contemporaneu. El videu ye un dispositivu que ye quién a rexistrar la realidá, que configura, al tiempu, la nuestra forma d’acceder a ella: la propia forma de ver.

A lo llargo de la so historia’l videu foi desenvolviendo un llinguaxe nuevu específicu gracies a la so capacidá pa producir y re-producir imáxenes al mesmu tiempu. Y, sicasí, la so gramática ye mutante, porque se rellaciona igual col cine, la fotografía, la televisión o tamién la performance, al usase pa rexistrar acciones variaes. Amás d’indexar lo real, el videu ye quién a esparder la idea de tiempu, articulando un fluxu d’imáxenes que se consumen en directo, al serviciu de la comunicación de la nuestra aldea global.

Esta selección de películes del fondu de Le Fresnoy quier dibuxar un mapa compuestu por delles maneres d’averase al paisaxe.

Al traviés del desplazamientu de la cámara per una serie d’espacios tanto urbanos como naturales, los ocho autores recoyíos na muestra ponen en relieve estratos socesivos del territoriu. Dada la naturaleza mimética, anque poética, de la representación d’imáxenes en movimientu, esta muestra trata de formes complementaries, ente mentales y descriptives, de lleer un sitiu y les sos característiques: edificios, cais, piedres, árboles o costes. Y tamién d’espacios escondíos o invisibles, que funcionen como llinies d’articulación separando lo particular de la tentativa moderna de facer uniforme la imaxe del mundu, puntos ciegos qu’al tiempu xunten y separen, xugando a fixar límites y fronteres al empar que les borren.

El mapa opónse al calcu, a lo idéntico. Como les películes equí presentaes, los mapes describen al traviés d’un tipu d’averamientu a la realidá de corte performativu, quier dicise, desmontable y modificable. Volver a ver, asina, supón dalgo más que volver a lo mesmo. Reproducir, entós, tampoco nun diba ser reproducir pa fixar lo mesmo.