Universo vídeo_el otro audiovisual español

23 ochobre 2013 – 5 xineru 2014

Un percorríu pela plataforma audiovisual Plat

Esta esposición muestra’l trabayu d’artistes de la plataforma/archivu audiovisual PLAT, un archivu fílmicu online de cine español independiente y tamién una plataforma de difusión y investigación audiovisual basada na autoxestión y l’accesu llibre a conteníos.

Acullá d’un discursu esternu sobre’l qu’articular les obres, la muestra quier dar visibilidá a les últimes tendencies de la creación audiovisual poniendo atención nos trabayos que, de dalguna forma, falen por ellos mesmos.

Como si se tratare d’un circuitu eléctricu o d’un sistema, les singularidaes de cada pieza reboten, afecten y tresformen a la siguiente articulando, por sí mesmes, un rellatu onde formes y motivos narrativos variaos asóciense o ruempen vínculos cola so tradición.

Estes obres texen, al tiempu, una rede alredor del conxuntu que tien muncho d’estáu de la cuestión: del documental nuevu col so interés d’acceder a lo real, a les pantasmes del pasáu qu’acechen el presente al traviés d’esperimentos con formes, testures y colores, pasando pel diariu filmáu, el reportaxe, el videu musical, les sinfoníes urbanes o otres intervenciones técniques como’l collage, la película atopada o l’apropiacionismu.

Amás, la muestra tien un calter competitivu. Pal Festival Internacional de Cine de Xixón, va concedese un premiu a ún de los participantes de la esposición que consiste nuna residencia de producción de dos selmanes en LLABoral. El resultáu d’esta va presentase nel FICX a lo llargo del añu 2024.