Universo vídeo. Showcase HAMACA

4 payares 2015 – 28 febreru 2016

El mediu (nun) ye (namás) el mensaxe

Ocho pieces del catálogu de la distribuidora de videu arte HAMACA, seleccionaes al traviés d’una convocatoria pública, componen esta muestra, que va facese en LLABoral Centru d’Arte del 4 de payares del 2015 al 28 de febreru del 2016.

El xuráu, amás, seleccionó a l’artista María Cañas como ganadora del premiu ficxLLAB, que consiste nuna beca de producción nel centru de producción de LLABoral pa crear una obra audiovisual que va mostrase na edición viniente del Festival Internacional de Cine de Xixón.

Tratase de pieces que reflexonen sobre lo específico del mediu audiovisual, al traviés de temes como la conversión a dixital o, tamién, les tresformaciones estétiques y narratives que l’usu de determinaos dispositivos tecnolóxicos acarria.

La referencia ambigua a la frase tan socorrida de Marshall McLuhan (El mediu ye’l mensaxe) marca distancies frente a la fe nel progresu profesada pol ideólogu de l’aldea global y fundador de la teoría de la comunicación electrónica. D’esta manera los videos participen d’una cierta señaldá polos procesos físicos, apostando polos métodos de creación híbridos, onde tecnoloxíes y formes de facer confunden medios con oxetivos.