La mecamística del cine
Esta esposición propón al visitante adientrase nel universu encandilador de José Val del Omar (1904-1982), ún de los cineastes (o cinemistes como él quería más que lu llamaren) más orixinales y menos conocíos del nuestru país, que consideró’l cine como un arte total y que trabayó nél dende la esperimentación más vanguardista.
Col neoloxismu mecamística (mecánica + mística), l’artista refierse al universu de les máquines, coles que s’encara, igual que cola realidá, con una actitú mística, que quier ver acullá de lo inmediato.
La muestra recueye materiales de naturaleza estremada colos que l’artista trabayó a lo llargo de la so trayectoria: testos ensayísticos, poéticos y técnicos, documentos (como la patente de la diafonía y de los formatos cinematográficos BiStandard y Intermediate), los prototipos d’equipos de soníu (como l’atril del Fonema Hispánico), o semeyes y collages.
El llaboratoriu PLAT (acrónimu de Picto Lumínica Audio Tactil), recreáu nes sales a partir de los oxetos orixinales que lu componíen, ye ún de los núcleos de la propuesta. El PLAT (1974-1982) condensa la última obra de José Val del Omar, un procesu inacabáu y en mutación de contino. Ellí, el realizador configuró un taller d’esperimentación y foi’l sitiu onde pasó los últimos años de la so vida, concentráu na producción d’un cuerpu de variaciones audiovisuales, testos y collages que se caltuvieron nel so allugamientu orixinal hasta anguaño. Na esposición tamién se van ver los sos dos curtiumetraxes Aguaespejo granadino (1953-55) y Fuego en Castilla (TactilVisión del páramo del espanto) (1958-60).