Vacacional ye una videoinstalación que garra como puntu de partida la Ciudá Residencial de Perlora construyida ente 1954 y 1967 por iniciativa de la organización Educación y Descanso. Ideada como un sitiu de vacaciones pa determinaos trabayadores d’empreses públiques, la ciudá residencial forma parte d’una estratexa más amplia usada pol franquismu pa construyir, al traviés del turismu, una imaxe d’apertura mentes la dictadura se mantién ensin cambeos. El proyectu tuvo tamién ciertu matiz utópicu lligáu al movimientu modernu y la so promesa d’una meyora de la sociedá al traviés de l’arquitectura y el progresu. Dende’l 2006 la Ciudá Residencial de Perlora atopase zarrada y n’estáu d’abandonu; sicasí, sigue siendo un sitiu bien importante p’alcuentros sociales de toa triba.
Nesti contestu, Vacacional busca xenerar asociaciones ente l’arquitectura del llugar, vinculada al ociu y al descansu, y la noción de «señardá reflexiva» de Svetlana Boym. La investigadora Paula Leu yá señaló nel so artículu académicu Habitar la ruina. Repensar el pasáu industrial dende’l presente posindustrial (2020) la rellación ente esti espaciu y el conceptu de Boym.
Esti tipu de señardá usa la distancia crítica pa reflexonar sobre la historia, reconsiderar el pasu del tiempu y recuperar los vínculos ente utopía y memoria. Vacacional propón una serie de xestos que busquen alteriar la manera en que percibimos el contestu onde asoceden y trabayen nel alcuentru ente procesos de producción manuales y dixitales como una manera d’estirar y contrayer el tiempu.
Garrando como referencia les acciones de les persones que s’apropien de la Ciudá Residencial de Perlora al través del usu informal de les sos instalaciones, esti proyectu entruga: ¿Podemos rellacionanos activamente colos símbolos del pasáu, ensin convertilos en murueques nin en reliquia? ¿Qué posibilidaes tenemos d’habitar un sitiu que ta n’estáu d’abandonu intencionáu? ¿Amás de contemplar con señardá los edificios dende fuera, qué cambeos na percepción pue suponer entrar nellos?
Vacacional ye’l proyectu ganador de la Beca de Producción LABjoven_Experimenta 2022 y producióse al traviés d’una residencia en LLABoral Centru d’Arte.