Estratexes nueves d’archivu pa una cultura asturiana
A partir d’una residencia d’investigación nos fondos del Muséu del Pueblu d’Asturies, Juan José Pulgar y Noé Baranda desenvuelven n’Usos y formas un trabayu ente la cultura visual y l’antropoloxía.
La imaxe ye quién a facer del tiempu una cosa visible, dalgo que va acullá de la simple cadena de causes y efectos. Na so disposición descúbrese de qué manera los vínculos, dende l’anacronía, se desenvuelven al marxe de l’asemeyanza, abriéndose al campu de la imaxinación, aquel que Baudelaire definía como “el más afayadizu pa les rellaciones íntimes y secretes de les coses, les correspondencies y les analoxíes”.
Usos y formas, dende la fotografía y la instalación, reflexona sobre lo específico del contestu asturianu. El trabayu de los artistes presenta una especie d’atles qu’abarca dende l’arquitectura y el diseñu de la Universidá Llaboral o de la ciudá-colonia de Perlora, al movimientu neorrural o, tamién, al llabor etnográficu de Fritz Krüger o Modesto Montoto, colos sos trabayos nel mediu rural asturianu.
La esposición trabaya sobre la idea de lo múltiple que, al traviés del tiempu, busca establecer correspondencies: una cierta historicidá de les formes que, a lo último, demuestra como’l tiempu se dibuxa n’espiral, nunca como una llinia recta.