Un mapa del audiovisual contemporaneu
Esta esposición muestra’l trabayu d’artistes de la plataforma/archivu audiovisual La Vidéothèque, un centru de recursos online que dende’l 2010 recueye y difunde la creación de video-artistes del mundu enteru. Comprometida cola creación visual, La Vidéothèque entama amás proyecciones, publicaciones web y ediciones de testu. Inscríbese asina nuna rede d’intercambeos y collaboraciones con estructures artístiques caracterizaes pol signu de l’autoxestión y l’accesu llibre a conteníos.
Universo vídeo. La Vidéothèque presenta nueve trabayos que representen les últimes tendencies de la creación audiovisual. Como nun circuitu eléctricu o un sistema, les singularidaes de cada obra reboten, afecten y tresformen a la siguiente articulando, por sí mesmes, un rellatu onde otres formes y motivos narrativos variaos s’asocien o ruempen vínculos.
Asina, les obres texen una rede que tien muncho d’estáu de la cuestión. Del documental y los xuegos alredor de la realidá, a les pantasmes del pasáu qu’acechen el presente, al traviés d’esperimentos con formes, testures y colores, pa llegar a xéneros más concretos, como son el diariu filmáu, el reportaxe, el videu musical, les sinfoníes urbanes o otres intervenciones técniques como’l collage, la película atopada o l’apropiacionismu.
La esposición tien tamién un calter competitivu. Nel Festival Internacional de Cine de Xixón va concedése-y un premiu a ún de los artistes participantes na esposición que consiste nuna residencia de producción de dos selmanes en LLABoral Centru d’Arte y Creación Industrial. El trabayu resultante de la mesma va presentase nel FICX a lo llargo del añu 2015.