Animaciones pa formar y deformar un sitiu
El pasu qu’hai de lo físico a lo virtual ye un sitiu cada vez más porosu. Nociones como escala, dimensión o midida, qu’enantes definíen l’espaciu de manera supuestamente oxetiva, vense anguaño rebalsiaes, faciendo urxente una definición nueva, ensin dulda más suave, del conceptu d’esperiencia; ello ye, una manera de concebir los sitios non tan polarizada pola separación ente realidá y ficción qu’acechó siempre a la imaxe.
Al calor del desenvolvimientu científicu y técnicu del sieglu XIX, cuando l’anovación industrial reclamó un sitiu al llau del arte y del ociu, nacieron técniques socesives d’animación como los dibuxos animaos, les siluetes, el stop motion, la rotoscopia, el diseñu gráficu o’l 3D asistíu por computadores que tresformaron la nuestra manera de rellacionanos col tiempu y col espaciu.
Anguaño ye posible la interacción ente elementos reales y elementos diseñaos dende la inmaterialidá absoluta d’un ordenador. Operación, la de tresformar lo material n’inmaterial y al revés, que la nuestra percepción entiende como una estensión natural de lo real, o como l’apertura d’un espaciu mental que, a pesar de la so virtualidá, poseye un cuerpu.
L’animación amplifica dellos esperimentos que nacieron yá a lo llargo del Renacimientu y convirtióse nel pegollu d’una industria floreciente que tresformó los videoxuegos nel fenómenu de mases que dacuando foi’l cine. D’esta forma, l’usu de la xeometría proyectiva nes manes de los pintores del sieglu XIV, marca una serie de finxos na construcción d’un espaciu ilusoriu. El cuadru, anguaño la pantalla, rondó al traviés de los sieglos alredor de la idea d’engañar a los nuestros güeyos pa (de)mostrar finalmente’l movimientu, como pue vese, por exemplu, nel seminal Desnudu baxando la escalera (1912) de Marcel Duchamp.
El conxuntu d’obres que formen esta esposición nun nagüen por construyir nenguna especie d’antoloxía, a pesar de pivotar alredor a dos pieces históriques, que señalen dos momentos pioneros nel desenvolvimientu de l’animación. La idea, pela so parte, ye esplorar de qué manera se rellacionen ilusión y espaciu cuando’l tiempu se tresforma en dalgo flexible y suxetivo. El espacio de la ilusión quier poner de relieve la versatilidá d’un conxuntu de técniques pa dar respuestes alternatives, y inclusive contradictories, a configuraciones del espaciu de calter personal, que son quién, en definitiva, a provocar delles tresformaciones na esperiencia que, de mano, namás se-y suponíen al tiempu.