Un intercambéu artísticu nel marcu del Arcu Atlánticu
Presentación de la muestra: 31 de xunetu a les 12:00 h en LLABoral Centru d’Arte.
Depués de la presentación, l’artista Neal Beggs va activar la so pieza cola collaboración d’Ernesto Avelino, Roberto Lobo y Pablo Díaz.
Inauguración: miércoles 31 de xunetu a les 19:30 h nel Centru de Cultura Antiguu Institutu
L’oxetivu d’esti proyectu ye abrir una canal de comunicación pa dir y volver ente Nantes y Xixón. Una vía inesplorada de la que surde esta esposición con dos sedes, el Centru de Cultura Antiguu Institutu (hasta’l 15 de setiembre) y LLABoral Centru d’Arte y Creación Industrial (hasta’l 29 de setiembre), que presenta cuatro propuestes artístiques feches a lo llargo d’una residencia de producción.
Con Traslaciones faise referencia a un tipu de movimientu: la proyección física d’un cuerpu que, a pesar de cambiar de posición, permanez idénticu nel espaciu; y, al tiempu, a una tresformación nel planu simbólicu: cuando la necesidá de traducir d’un llinguaxe a otru pasa a ser un desiertu que nun se dexa cartografiar. Los trabayos presentaos constituyen formes alternatives d’esplorar l’espaciu y el tiempu. Son intentos de comprender el mundu y, tamién, de romper les llendes de la representación.
Superen la midición física ensin más y refuguen esencies afitaes: imáxenes, oxetos y soníu ponen n’entredichu lo que conocemos y la manera de percibilo. En cuenta de dibuxar llinies d’orientación, conviértense en vórtices, fluxos circulares. D’esta forma, el cumal de tou viaxe sería l’alcuentru, la re-distribución de posiciones.