Un proyectu de Studio Corte 17 dientro de les Xornaes Internacionales sobre Patrimoniu Industrial d’INCUNA
TAI–TUSCAN ART INDUSTRY ye un proyectu de Studio Corte 17, una asociación cultural que trabaya na investigación de práctiques artístiques y esperimentales nueves y l’estudiu cuidadosu del paisaxe industrial de la ciudá de Prato (Italia). El determín de trabayar nel proyectu con fábriques inactives naz del contactu estrechu con estes a lo llargo de cuasi decenios y de la voluntá fuerte de crear un vínculu ente l’arte contemporaneu y l’arquitectura típica del so territoriu.
El proyectu TAI naz nel 2015 como un llaboratoriu d’investigación qu’implica a artistes, comisarios, fotógrafos, músicos y performers que trabayen en sinerxa y temporalmente dientro de sitios d’arqueoloxía industrial de la Toscana. Esti proyectu ye parte del gran cambéu que la ciudá de Prato vive nos últimos años, siendo oxetu de munches reflexones urbanes, arquitectóniques y antropolóxiques.
TAI desenvuélvese al traviés de dellos planos d’acción que van dende la rexeneración de sitios abandonaos, la formación de mozos y moces al traviés de llaboratorios, talleres y residencies en contenedores vacíos recuperaos y dotaos de funciones nueves, hasta la creación d’itinerarios cola mira de desenvolver formes nueves de turismu alternativu que potencien les singularidaes de la ciudá.
El proyectu pon en collaboración espacios privaos, instituciones, alministraciones públiques, centros de producción artística y delles asociaciones de la zona. Nel so equipu implíquense dellos profesionales que trabayen nel ámbitu cultural, artísticu, históricu y arquitectónicu.
Céntrense na esperimentación de les artes visuales contemporánees p’acoyer, dientro de los sitios escoyíos, idees, sensibilidaes y obres híbrides, trabayando davezu cola ayuda d’archivos históricos que la xente pue volver ver nuna esperiencia tridimensional.
TAI diseñó un mapa del paisaxe industrial de la ciudá y el so proyectu incluye tanto fábriques industriales abandonaes como fábriques actives o rexeneraes: edificios que medraron a lo llargo de los sieglos con una arquitectura lligada a la memoria del tiempu. Esta investigación tan cuidadosa foi posible gracies a un conocimientu precisu de la ciudá y teniendo como referencia’l catálogu La città abbandonata d’Alberto Breschi publicáu en 1980.